Цагаан сар үзэсгэлэн худалдаанд 280 орчим нэр төрлийн бүтээгдэхүүн худалдаж, 1.1 тэрбум төгрөгийн борлуулалт хийжээ.
Монгол Улсын Ерөнхийлөгчийн санаачилсан “Хүнсний хангамж – Аюулгүй байдал” үндэсний хөдөлгөөн, 2025-2028 онд хөдөө аж ахуйн боловсруулах салбарын үйлдвэрлэлийн хөгжлийг хангах зорилт, “Бизнесийн хөгжлийг дэмжих” урианы жилийн хүрээнд тус үзэсгэлэн худалдааг зохион байгуулсан юм.
Үзэсгэлэн худалдаагаар үйлдвэрлэл эрхлэгч иргэд, аж ахуйн нэгж, хоршоод, оролцсон баялаг бүтээгчдээсээ шилдгүүдээ тодрууллаа. Тухайлбал, хүнсний шилдэг бүтээгдэхүүнээр Лүн сумын “Эрүүл монгол мах-эко” ХХК-ийн “Амталсан таван цулын шөл”, аж үйлдвэрийн шилдэг бүтээгдэхүүнээр Зуунмод сумын иргэн Ц.Борын “Морин хуур” шалгарлаа.
Шилдэг сав, баглаа боодолтой мөнгөн богц бүтээгдэхүүнээр Архуст сумын “Энэрэл тулуй” ХХК-ийн “Ундрам” зөгийн бал, шилдэг органик хүнс үйлдвэрлэгчээр Батсүмбэр сумын “Төгс уураг” ХХК-ийн “Хатаасан био тараг” шалгарсан юм.
Шилдэг онцлох бүтээгдэхүүнээр Баянцогт сумын иргэн Д.Энхзаяагийн “Сүүн чихэр”, шилдэг гар урлалын бүтээгдэхүүнээр Борнуур сумын иргэн Г.Тогмидийн “Модон урлал”, шилдэг хоршоогоор Сүмбэр сумын “Удам дамжсан малчин” хоршоо тус тус шалгарлаа.
“Цагаан сар-2025” үзэсгэлэн худалдаанд хамгийн сайн зохион байгуулалттай оролцсон шилдэг сумаар Архуст сум тодорсон байна.
Төв сайхан нутгийнхаа ажилсаг хөдөлмөрч малчид, тариаланчид, жижиг дунд үйлдвэрлэл эрхлэгчдийн үйлдвэрлэсэн бүтээгдэхүүнийг үйлдвэрлэгчээс хэрэглэгчдэд шууд худалдан борлуулах, зах зээлийг тэлэх, өрсөлдөх чадварыг нэмэгдүүлдэг үзэсгэлэн худалдааг 2005 оноос эхлэн зохион байгуулж эхэлсэн.
Жилээс жилд үйлдвэрлэл эрхлэгчдийн тоо нэмэгдэж, үүнийг дагаад бүтээгдэхүүний нэр төрөл, цар хүрээ өргөжиж, зах зээлийн эрэлт хэрэгцээгээ даган сав, баглаа боодлын өнгө үзэмж сайжирсаар байгааг иргэд онцолж байв.
Мөн өмнө жилийнхтэй харьцуулахад үнийн хувьд хүнсний ногоо 500-1000 төгрөгөөр хямд, мах дунджаар 1000, цагаан идээ 5000, айраг 1000-2000 төгрөгөөр нэмэгдсэн байна.
Эх сурвалж: Монцамэ агентлаг