Шинэ хоршоо хөдөлгөөний салбар дундын уялдааг хангах Үндэсний хороонд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон ЕТГ-ын Хүнсний төсөл, хөтөлбөрийн алба, ЕТГ-ын дэргэдэх Эрдэмтдийн зөвлөл, “Хүнсний Хувьсгал” мэргэжлийн холбооны төлөөллүүд ажиллалаа. Шинэ хоршоо хөдөлгөөний салбар дундын уялдааг хангах Үндэсний хорооны Ажлын албаны дарга Ё.Азжаргал тус хорооны үйл ажиллагааны тайлан, төлөвлөгөөг танилцууллаа.

Засгийн газраас хоршоогоор дамжуулж малчдын амьжиргааг дэмжих, мал, малын гаралтай түүхий эд, бүтээгдэхүүний мөнгөн урсгалыг сайжруулах зорилгоор “Шинэ хоршоо хөдөлгөөн”-ийг өрнүүлж, “Шинэ хоршоо-Чинээлэг малчин” арга хэмжээний таван жилийн төлөвлөгөөг хэлэлцэн баталж, хоршооны гишүүн малчинд хөрөнгө оруулалтын хөнгөлөлттэй зээл олгохоор шийдвэрлэж байсан.

Хөрөнгө оруулалтын зээлийг арилжааны банкуудын өөрийн эх үүсвэрээр олгосон бөгөөд хүүгийн зөрүүний дэмжлэгийг Засгийн газраас олгож, зээлийн барьцаа хөрөнгийн батлан даалтыг Зээлийн батлан даалтын сангаас 80-100 хувь хэрэгжүүлсэн аж. Шинэ хоршоо хөдөлгөөн өрнөж эхэлснээс хойш 77 мянга гаруй малчин хоршоонд элсжээ.

Мөн “Шинэ хоршоо” хөдөлгөөний хүрээнд 20 мянга гаруй малчин, нийт 687 тэрбум төгрөгийн хөрөнгө оруулалтын зээл авчээ.

“Шинэ хоршоо хөдөлгөөн” тогтвортой үргэлжилсэнээр мал аж ахуйн салбарыг уур амьсгалын өөрчлөлтийн сөрөг нөлөөллөөс хамгаалах, гэнэтийн гамшиг ослын үеийн эрсдэлийг бууруулах, малчин өрхийн амьжиргааг дэмжих, орлогыг нэмэгдүүлэх, мал, малын гаралтай түүхий эд, бүтээгдэхүүний мөнгөн урсгалыг тогтмолжуулах, хүнсний аюулгүй байдал, тогтвортой нийлүүлэлтийг бий болгох, хоршоологч, үйлдвэрлэгчийн түншлэлийг дэмжиж, жижиг, дунд үйлдвэрлэлийг тогтвортой хөгжүүлэх, хөдөөгийн сэргэлтийг бодит ажил болгох зэрэг ач холбогдолтой юм.

Салбар дундын уялдаа холбоог ханган малын түүхий эд, мах махан бүтээгдэхүүн, сүү сүүн бүтээгдэхүүний гарц, чанарыг сайжруулах чиглэлд “Хүнсний хувьсгал” үндэсний хөдөлгөөнтэй хамтарч ажиллах санал солилцож, цаашдын төлөвлөгөөг хэлэлцлээ.