Эрүүл амьдралын хамгийн чухал хүчин зүйлсийн нэг бол эрүүл хооллолт байдаг. Халуун дулааны улирал ирж байгаа энэ үед хүнсний бүтээгдэхүүн тэр дундаа түргэн муудах бүтээгдэхүүнийг буруу нөхцөлд хадгалснаас болж хоол хүнсээр дамжин хүн амын дунд хоолны хордлого, хордлогот халдвар тархах нөхцөлийг бүрдүүлдэг билээ. Тэгвэл эрүүл хооллолт, аюулгүй хүнс дэлхий нийтийн толгой өвтгөсөн сэдэв болоод байгаа үед та худалдаж авсан хүнсээ хэрхэн хадгалах талаар ямар ойлголттой байдаг вэ? Түргэн муудаж, амт шимтээ алддаг хүнсний бүтээгдэхүүнийг хэрхэн зөв хадгалах талаар бяцхан зөвлөгөөг хүргэе.

• Хоол, хүнсний зүйлд нян өсөж үржих хамгийн таатай орчин нь температурын аюултай бүс буюу +4-өөс +60 хэм байдаг. Иймээс хөргөгчид хадгалах ёстой бүтээгдэхүүнийг худалдаж авснаас хойш нэг цагийн дотор хөргөгчид хийх хэрэгтэй. Хэрвээ температурын аюултай орчинд дөрвөн цагаас илүү хадгалсан бол идэж болохгүй, шууд хаях хэрэгтэй.
• Баглаа боодолгүй, хугацаа нь дууссан хүнсний бүтээгдэхүүн болон, удсан хүнсний бүтээгдэхүүн бүү худалдаж аваарай.
• Завсар зайтай болон таглаагүй саванд удаан хадгалсан бүтээгдэхүүн хэрэглэхээс зайлсхий. Аливаа бүтээгдэхүүнийг хадгалахдаа паалантай саванд хийх хэрэгтэй. Хуванцар сав нь хүний биед хортой байдаг төдийгүй тухайн хүнстэй урвалд орж болзошгүй.
• Таг нь товойсон, эсвэл онгорхой лаазтай бүтээгдэхүүн хэрэглэж болохгүй.
• Хоолоо болгосны дараа хэрэглэхгүй бол аль болох хурдан хүйтэн газар хийж хөлдөөх хэрэгтэй.
• Мах, салат зэрэг хөргөгчид хадгалдаг хүнсний бүтээгдэхүүн болон болсон хоолыг өрөөнд 2 цагаас илүү хугацаагаар үлдээвэл бичил биетэн үржих аюултай.
• Хоносон хоол бүү хэрэглээрэй. Тэнд үржсэн нян ходоодонд орж, дотор гэдэсний өвчин үүсгэх нөхцөл болдог байна.