Монгол Улсад чихрийн шижингийн оношийг дөрөвхөн сартай нярайд тавьсан тохиолдол бүртгэгдэж, эрүүл мэндийн салбарт анхаарал татсан асуудал болоод байна. Энэхүү тохиолдол нь нэгдүгээр хэлбэрийн чихрийн шижин байх магадлалтай бөгөөд энэ нь дархлааны тогтолцооны үйл ажиллагааны алдагдлаас үүдэлтэй, удамшлын болон байгаль орчны хүчин зүйлтэй холбоотой өвчин юм.

Хэдийгээр нярай хүүхдэд онош тавигдсан нь эхний ээлжинд генийн удамшлыг сэжиглэх үндэстэй ч, жирэмсний үеийн хооллолт, амьдралын хэв маяг, эрүүл мэндийн хяналт маш чухал үүрэгтэй болохыг эмч мэргэжилтнүүд онцолж байна.

Сүүлийн жилүүдэд Монголд чихрийн шижинтэй хүүхдийн тоо нэмэгдэж, өсвөр насанд ч оношлогдох хандлага эрс өсч байна. Улсын хэмжээнд нэгдүгээр хэлбэрийн чихрийн шижинтэй 0-18 насны 253 хүүхэд, 18-аас дээш насны 450 гаруй хүн, нийтдээ 700 орчим иргэн байна. Тэдний 40 гаруй хувь нь 16-гаас доош насны хүүхдүүд байна гэх статистик гарчээ. Энэ нь эрүүл бус хооллолт, хөдөлгөөний хомсдол, жирэмсний үеийн хяналт сул байдалтай холбоотой гэж мэргэжилтнүүд үзэж байна.

Энэхүү тохиолдол нь эцэг эхчүүдэд эрүүл хооллолтын ач холбогдлыг ухамсарлуулах дохио болох ёстой. Жирэмсний үеэс эхлэн зөв хооллох, сахараа хянах, эмчийн хяналтад байх нь ирээдүйн хүүхдийн эрүүл мэндийг хамгаалах хамгийн чухал алхам юм.