Ховд аймаг 2025 оныг баялаг бүтээгчдийг дэмжих жил болгосон.

Энэ хүрээнд орон нутгийн баялаг бүтээгч, жижиг дунд үйлдвэрлэл эрхлэгч, гарааны бизнес, залуу энтрепренерүүд болон бодлого тодорхойлогчдын хамтын ажиллагааг бэхжүүлэх, бизнес эрхлэх орчныг сайжруулах, шинэ санаа, дэвшилтэт шийдлийг нутагшуулах зорилгоор “Ховдын бизнес долоо хоног” үйл ажиллагаа зохион байгуулна.

Энэ сарын 19-23-нд аймгийн хэмжээнд бизнес, эдийн засаг, инновац, хөдөлмөр эрхлэлт, хүний хөгжил зэрэг олон талт хэлэлцүүлэг, үзэсгэлэн, зөвлөгөөн, өдөрлөг зэргийг тусгай хуваарийн дагуу зохион байгуулах юм.

Мөн Ховд аймгийн жижиг дунд үйлдвэр, бизнес эрхлэгчдийн бүтээгдэхүүн, үйлчилгээг иргэд, олон нийтэд сурталчлах “Баялаг бүтээгчдийн үзэсгэлэн”, бодлого тодорхойлогчид, бизнес эрхлэгчид, залуусын оролцоотойгоор тулгамдсан асуудлыг хэлэлцэж, шийдэл тодорхойлох “Зөвлөгөөн ба хэлэлцүүлэг”, санхүүжилт, дижитал маркетинг, хүний хөгжил, бизнесийн чиг хандлага зэрэг сэдвээр “мэргэжлийн сургалт” өрнөнө.

Гурван өдрийн турш менторинг, сургалт, багийн ажил бүхий стартап бойжуулах хөтөлбөр буюу “Залуучуудын гарааны бизнесийг дэмжих хөтөлбөр”, мөн хөдөлмөр зуучлал, карьер хөгжлийн зөвлөгөө, ур чадварын сургалт олгох “Мэргэжилтэй ажилтан-Ховдын баялаг” хөдөлмөр зуучлалын өдөрлөг, стартап, шинэ санаачилгыг олон нийт, шийдвэр гаргагчид, хөрөнгө оруулагчдын өмнө танилцуулах “Demo Day” зэрэг үйл ажиллагаа болно.