Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд “Хархорум” хотод ойн зурвас байгуулах ажлын хэсгийн өргөтгөсөн хурал боллоо. Хуралд Монгол Улсын Ерөнхийлөгчийн Тамгын газрын даргын 2025 оны 03 дугаар сарын 28-ны өдрийн 58 дугаар захирамжаар батлагдсан Хархорум хотын ойн зурвасыг байгуулахад дэмжлэг үзүүлэх үүрэг бүхий ажлын хэсгийн ахлагч Н.Хүрэлбаатар, Ерөнхийлөгчийн үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн хот, хөдөөгийн бодлогын зөвлөх Г.Ганболд болон ажлын хэсгийн гишүүд, тус бүтээн байгуулалтад оролцож буй аж ахуйн нэгжүүдийн төлөөлөл оролцов.
Ажлын хэсгийн гишүүд “Тэрбум мод” үндэсний хөдөлгөөний хүрээнд Хархорум хотод ногоон бүс байгуулах ажлын явцтай танилцаж, мэргэжлийн хүмүүстэй мэдээлэл солилцох, хоцрогдож буй ажлыг эрчимжүүлэх чиглэлээр ажиллав.
Хурлаар:
- Бүтээн байгуулалтад оролцож буй аж ахуйн нэгжүүд хариуцан гүйцэтгэж буй талбайд ажиллах
- Хархорум хотын ногоон бүсийн бүтээн байгуулалтын явцтай танилцах (A, B, C, D, E, F, G талбарууд)
- Хархорум хотын цэцэрлэгт хүрээлэнгийн бүтээн байгуулалттай танилцах
- Хархорум хотод ногоон бүс байгуулах ажлын хэсгийн хуралд оролцох, тулгамдаж буй асуудлуудыг хэлэлцэж, шийдвэрлэх.
“Хархорум” хотод ногоон бүс байгуулах ажлын явцад тулгамдаж буй хэд хэдэн асуудлыг энэ удаагийн хурлаар хэлэлцэж, шийдвэрлэлээ.
Монгол Улсын Ерөнхийлөгчийн Тамгын газрын даргын 2025 оны 03 дугаар сарын 28-ны өдрийн 58 дугаар захирамжаар батлагдсан Хархорум хотын ойн зурвасыг байгуулахад дэмжлэг үзүүлэх үүрэг бүхий ажлын хэсгийн бүрэлдэхүүн үргэлжлүүлэн Хархорум хотын ногоон бүсийн бүтээн байгуулалтын ажлын явцтай танилцлаа.
Сар хүрэхгүй хоногийн өмнө Өвөрхангай аймгийн Хархорин сумын энэ хэсэг хоосон тал газар байсан. Тэгвэл “Тэрбум мод” үндэсний хөдөлгөөний хүрээнд “Хархорум” хотод ойн зурвас байгуулах ажил эрчимтэй өрнөж, өнөөдрийн байдлаар 200 мянга гаруй навчит болон шилмүүст мод суулгажээ. Мөн төлөвлөгөөт ажлын хүрээнд 20 гаруй км хашаа барьж, 48 ширхэг худаг гаргасан байна.
“Тэрбум мод” үндэсний хөдөлгөөний хүрээнд “Хархорум” хотод ойн зурвас байгуулах бүтээн байгуулалтын ажлын төлөвлөгөөний дагуу энд “НЭГ САЯ” мод тарих, Хархорум хотын цэцэрлэгт хүрээлэн бүтээн байгуулах, 180 машины авто зогсоол барих, Хэлтгий цагаан нуурыг нөхөн сэргээх, Архелогийн олдворыг хамгаалах, хөгшин ОРХОН голыг сэргээх зэрэг томоохон ажлууд хийгдэх аж.
Энэ ажилд ЕТГ, Өвөрхангай аймгийн ЗДТГ, төрийн болон хувийн өмчит компаниуд, ЗХЖШ, орон нутгийн иргэдээс бүрдсэн 1500 гаруй мэргэжлийн хүмүүс гар бие оролцож байна.
