Алтан намрын амтыг шингээсэн монгол тариаланчид, хүнсчдийн энэ 2022 онд хийсэн бүтээлийн дээжийг дэлгэсэн “Намрын ногоон өдрүүд” үзэсгэлэн 2022 оны 09 дүгээр сарын 18-25-ны өдрүүдэд амжилттай зохион байгуулагдлаа.
“НАМРЫН НОГООН ӨДРҮҮД ҮНДЭСНИЙ ҮЙЛДВЭРЛЭЛ-2022” арга хэмжээг хааж Хүнс, хөдөө аж ахуй, хөнгөн үйлдвэрийн дэд сайд Ж.Бат-Эрдэнийн хэлсэн үгийг бүрэн эхээр нь хүргэж байна.
Сайн байцгаана уу,
Эрхэм хүндэт хатагтай, ноёд оо,
Эрхэм хүндэт тариаланчид, ногоочид, үйлдвэрлэгчид ээ,
“Намрын ногоон өдрүүд үндэсний үйлдвэрлэл-2022” арга хэмжээний хаалтын ажиллагаанд хүрэлцэн ирсэн та бүхэнд энэ өдрийн мэндийг хүргэе.
Арван долоо дахь жилдээ зохион байгуулж байгаа Намрын ногоон өдрүүдийн арга хэмжээнд үндэсний үйлдвэрлэгчид маань бүтээгдэхүүнийн нэр төрөл олон, борлуулалт арвинтай оролцсонд талархаж байна.
Хүнсний салбараас 27 үйлдвэр, 21 аймгийн 120 гаруй үйлдвэрлэгч, аж ахуйн нэгж 1000 орчим нэр төрлийн бараа, бүтээгдэхүүнийг хэрэглэгчдэдээ хүргэж 130.9 сая төгрөгийн борлуулалт хийсэн байна.
Хөнгөн үйлдвэр, жижиг дунд үйлдвэрлэгчид, хоршоодын төлөөлөл нийт 140 гаруй аж ахуйн нэгж, байгууллага оролцож, 86 сая төгрөгийн борлуулалт хийсэн байна.
Газар тариалангийн үйлдвэрлэл эрхлэгч 16 аймгийн 23 сум, нийслэлийн 9 дүүргийн нийт 260 гаруй ногоочин, 12 аж ахуйн нэгж, 10 хоршоо, Монгол ногоо, ХААИС-ийн Агроэкологийн сургууль, Ургамал хамгаалал эрдэм шинжилгээний хүрээлэн, Нийслэлийн мэргэжлийн хяналтын газар, Хүнс, хөдөө аж ахуй, хөнгөн үйлдвэрийн судалгаа хөгжлийн төв, Монголын хөдөөг шинэчлэхийн төлөө фермерүүдийн холбоо, Хөдөө аж ахуйн бүтээмжийн төв, Хүлэмжийн холбоо, Ногоочдын холбоо зэрэг ТББ-ууд 40 гаруй нэр төрлийн 780 тонн хүнсний ногоо, 80 тонн төмс, 8 нэрийн таримал болон байгалийн жимс 170 кг, 20 нэр төрлийн жимсгэний суулгац 12 мянган ширхэг, 8 нэрийн гоёл чимэглэлийн мод бутны суулгац 1000 ширхэг, 50 гаруй нэрийн эмийн ургамал, 40 нэрийн тасалгааны цэцэг зэрэг бүтээгдэхүүнээр оролцож нийт 1.2 тэрбум төгрөгний борлуулалт хийсэн байна. Тариалангийн үйлдвэрлэлийн механикжуулалт, технологийн шинчлэл. тийг харуулсан техникийн үзэсгэлэнд гурван дилер аж ахуйн нэгж, хөдөө аж ахуйг дэмжих сан 20 гаруй нэрийн хөдөө аж ахуйн машин, техник тоног төхөөрөмжийг байрлуулж зөвлөмж өгч, сурталчилж оролцлоо.
Монгол Улсын Ерөнхийлөгчийн санаачлагаар “Хүнсний хувьсгал”-ыг зарлаж, “Хүнсний хангамж, аюулгүй байдлыг хангах талаар авах зарим арга хэмжээний тухай” Монгол Улсын Их Хурлын 2022 оны 36 дугаар тогтоолыг хэрэгжүүлэх гарааны жил амжилтаар дүүрэн байгаа нь ойрын хугацаанд хүнсний 19 нэр төрлийн бүтээгдэхүүнээр дотоодын хэрэгцээгээ бүрэн хангах зорилтыг амжилттай биелүүлэх бүрэн боломжтой болохыг батлан харуулж байна.
“Намрын ногоон өдрүүд үндэсний үйлдвэрлэл-2022” арга хэмжээний үндсэн хөтөлбөр өнөөдөр өндөрлөж байгаа боловч шинэ ургацын төмс, хүнсний ногоо, жимс жимсгэнийн борлуулалтыг нийслэл, аймаг хотын төвүүдэд өргөнөөр зохион байгуулж ажиллах болно.
Хүнс, хөдөө аж ахуйн гол салбар Мал аж ахуйн үйлдвэрлэлд “Шилмэл мал-2022” цахим үзэсгэлэн худалдааг анх удаа зохион байгуулахаар ажиллаж байна.
Хүнс, хөдөө аж ахуйн салбарын нийт ажилтан, ажиллагсад, малчид, тариаланчид та бүхэндээ эрүүл мэндийг, ургац хураалтын ажлыг технологийн хугацаанд чанартай гүйцэтгэх, өвөлжилт хаваржилтын бэлтгэл ажлыг шуурхай амжуулж хүн амыг хүнсээр, хүнс хөнгөн үйлдвэрлэлээ түүхий эдээр хангах ажилд нь амжилт дүүрэн байхын өлзийтэй ерөөлийг өргөн дэвшүүлье.
Сайн үйлс дэлгэртүгэй.
