Дэлхий дахинаа хүн амыг хүнсээр хангах бодлого, төлөвлөлт нь “Хүнсний хангамж, аюулгүй байдал” уруу чиглэж байсан бол цар тахлын үеэс эхлэн “Хүнсний хангамж, уян хатан, тогтвортой нийлүүлэлт” гэсэн бодлого төлөвлөлтлүү чиглэж байна.
Монгол Улсын Ерөнхийлөгч У.Хүрэлсүх ирэх таван жилд гол нэр төрлийн 19 хүнсний бүтээгдэхүүнээр дотоодын хэрэгцээгээ бүрэн хангах, цаашид хүнс экспортлогч орон болох, мөн малын өвчингүй эрүүл бүс бий болгох зорилтыг санаачлан 2022 оны 5 дугаар сараас орон даяар “Хүнсний хувьсгал” хөдөлгөөнийг эхлүүлсэн.
Уг хөдөлгөөнийг амжилттай хэрэгжүүлж, бодит үр дүнд хүрэх зорилгоор Монгол Улсын Их Хурал 36 дугаар тогтоол баталж, хүнс, хөдөө аж ахуйн салбарт ирэх таван жилийн хугацаанд 1.7 их наяд төгрөгийн хөрөнгө оруулалт, санхүүжилт хийхээр шийдвэрлэж, Засгийн газарт тодорхой чиглэл өгсөн. Мөн УИХ-аас тусгайлан Түр хороо байгуулж, төлөвлөсөн бодлого, арга хэмжээг бүсчилсэн хөгжлийн бодлоготой сайтар уялдуулах, хүний нөөцийг бэлтгэх, санхүүжилтийг нарийвчлан шийдвэрлэх болон удирдлага, зохион байгуулалтыг сайжруулах зэргийг Засгийн газарт үүрэг чиглэл өгсөн.
Өнөөдөр /2023.03.22/ Монгол Улсын Ерөнхийлөгчийн тамгын газрын дарга Я.Содбаатар тэргүүтэй албаны хүмүүс Монгол банк, арилжааны банкны төлөөллүүдтэй “Хүнс, хөдөө аж ахуйн үйлдвэрлэлийг дэмжих эргэлтийн болон хөрөнгө оруулалтын зээлийн санхүүжилт”-ын талаар зөвлөлдөх уулзалт хийлээ. Энэхүү уулзалт нь хүнсний хангамж, аюулгүй байдлын чиглэлээр арилжааны банкуудтай санал солилцож буй гуравдахь удаагийн уулзалт юм.
Хүнс үйлвэрлэгчид, баялаг бүтээгчдийг хөнгөлттэй зээл, татварын бодлогоор дэмжинэ.
УИХ, Засгийн газраас татвар, гаалийн чиглэлээр олон хөнгөлөлт, чөлөөлөлтүүд үзүүлж байна. Мөн гадаад зээл, тусламжийн эх үүсвэрийг ашиглаж байна.
Монгол Улсын 2023 оны төсөвт 223 орчим тэрбум төгрөгийн санхүүжилт тусгасан нь хүнс, хөдөө аж ахуйн салбарт сүүлийн 30 гаруй жилд хийгдээгүй төсвийн дэмжлэг юм. Үүний 135 тэрбум нь хүүгийн татаас бөгөөд уг Засгийн газрын хүүгийн татаастай нийт 1 их наяд төгрөг хүртэлх хөнгөлөлттэй зээлийг банкуудын чөлөөт эх үүсвэр ашиглан “Хүнсний хувьсгал” үндэсний хөдөлгөөнийг дэмжихээр болсон.
