“Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолын хэрэгжилтийн хангах төлөвлөгөөний хүрээнд Ерөнхийлөгчийн зөвлөх Ч.Даваабаяр өнөөдөр /2023.06.28/ ХААИС-ийн удирдлагуудыг хүлээн авч уулзлаа.

Уулзалтаар ХААИС-ийн Инженер технологийн сургуулийн захирал Ж.Мөнгөн, Агроэкологийн сургуулийн захирал А.Буянбаатар нар Хөдөө аж ахуйн салбарын дээд боловсролтой боловсон хүчний хангамжийг нэмэгдүүлэх замаар төрийн бодлогын хэрэгжилтийг хангах санал, хөтөлбөр танилцуулж, санал солилцлоо.

Тодруулбал, ХХААХҮЯ-ны 2021 оны судалгаагаар улсын хэмжээнд 21 аймаг, 331 суманд 1409 мэргэжилтэн ажиллаж байна. Үүнд:

• Мал аж ахуйн үйлдвэрлэлийн төлөвлөлт, менежмент, малын үржил, бүртгэлийн асуудал хариуцсан мэргэжилтэн 331 байхаас 277 орон тоон дээр 24 мэргэжлийн ажиллагсад ажиллаж, 54 сул орон тоо байна.
• Хүнс, жижиг, дунд үйлдвэрлэл, хоршооны асуудал хариуцсан мэргэжилтэн 331 байхаас 220 орон тоон дээр 93 мэргэжлийн ажиллагсад ажиллаж, 111 сул орон тоо байна.
• Бэлчээр, тэжээл, газар тариалангийн асуудал хариуцсан мэргэжилтэн 331 байхаас 228 орон тоон дээр 66 мэргэжлийн ажиллагсад ажиллаж, 103 сул орон тоо байна.

Иймд ХХАА мэргэжлүүдээр суралцах оюутны тоог нэмэгдүүлэх, ЕБС төгсөж буй хүүхэд залууст энэ салбарт суралцах сонирхлыг төрүүлэх, мэргэжилтэй ажилтны чадвар тоог нэмэгдүүлэх боломжийг эрэлхийлж, хэрэгжүүлэх, ХХАА чиглэлээр суралцаж буй суралцагчдад сургалтын амжилттай нь уялдуулан тэтгэлэг олгох хүсэлтэй байгаагаа уулзалтын үеэр хэллээ.

Энэ нь

• Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөний хэрэгжилтэд бодит үр дүн гарч, ард иргэдээ эрүүл аюулгүй хүнсээр хангагдах боломж бүрдэх,
• Монгол Улсын Засгийн Газрын тогтоолоор хөгжлийн тэргүүлэх болон эрэлттэй чиглэлд багтсан хөдөө аж ахуй, хүнсний салбарт нэн шаардлагатай дээрх мэргэжилтэй боловсон хүчний хангамж 20 гаруй хувиар нэмэгдүүлж 40 хувьд хүргэнэ.
• Хөдөө аж ахуй, хүнсний салбарт импорт орлох, экспортонд гарах бүтээгдэхүүний тоо, ажлын байрыг нэмэгдүүлэх,
• Хөдөө аж ахуй, хүнсний салбарт дэшилтэт технологиуд нэвтэрч хүнд хөдөлмөрийг халж ажиллах орчин сайжирч, салбарын хөгжилд бодит хувь нэмэр оруулж нийгэм, эдийн засгийн эерэг өөрчлөлт бий болгох зэрэг салбарын хөгжлийг түргэсгэхэд түлхэц болно гэж үзэж байгаагаа сургуулийн удирдлагууд илэрхийллээ.