2023.06.27-нд зохион байгуулагдсан “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолыг хэрэгжүүлэгч төрийн байгууллагуудын 2 дахь удаагийн зөвлөлдөх уулзалтаар БШУЯ-ны Төрийн нарийн бичгийн дарга Л.Цэдэвсүрэн “Хүнсний хувьсгал” үндэсний хөдөлгөөний хүрээнд боловсролын салбарт хэрэгжүүлж буй ажлын явц, тогтоолын хэрэгжилт, үр дүнгийн талаар илтгэл тавилаа.
УИХ-ын 36 дугаар тогтоолын 2.1-д тусгасан Хүнс, хөдөө аж ахуй, хөнгөн үйлдвэрлэлийн салбарын ажилтан бэлтгэх сургалтын чанарыг сайжруулах, эдгээр салбарт тэргүүлэх чиглэлээр суралцагчид сургалтын төлбөрийн дэмжлэг үзүүлэх төлөвлөгөөний хүрээнд болон Монгол Улсын Засгийн газрын “Алсын хараа 2050” урт хугацааны хөгжлийн бодлогыг хэрэгжүүлэх хүрээнд “Хөгжлийн тэргүүлэх болон эрэлттэй мэргэжлийн чиглэл”-ийг Засгийн газрын 2023 оны 03 сарын 29-ны өдрийн 115 дугаар тогтоолоор баталсан. Тодруулбал, Тэргүүлэх-83, Эрэлттэй-38 мэргэжлийн чиглэлийг баталсан байна.