Хүнс, хөдөө аж ахуй, хөнгөн үйлдвэрийн судалгаа хөгжлийн төвийн судалгааны баг Дорнод, Хэнтий, Булган, Сэлэнгэ, Төв аймгуудын нутгаар Зөгийн бэлчээр болон балт, тоост ургамлын нөөцийг тогтоох судалгаа хийж байна.
Судлагдаж буй бүс нутгуудад зөгийн балны үйлдвэрлэл явуулах боломж, байгалийн балт, тоост ургамлын зүйлийг тогтоох хээрийн тандалт судалгаа явуулж, тэдгээр ургамлын амтат шүүсний дээж авч, түүнд үндэслэн зөгийн балны биологийн нөөцийг тогтоохоор ажиллаж байна. Судалгааны багт Эрдэм шинжилгээ, судалгаа туршилтын хэлтсийн дарга М.Мөнхбат, эрдэмтэн нарийн бичгийн дарга Г.Чулуунбат, эрдэм шинжилгээний ажилтан Ж.Долгорсүрэн, Э.Энхтүвшин, С.Энхболд, биологийн шинжлэх ухааны доктор, профессор, ХАА-н шинжлэх ухааны академич Г.Очирбат зөвлөх нар ажиллаж байна.
Судалгааны багийн гишүүд тухайн бүс нутгийн зөгийчдөд зөгийн арчилгаа маллагааны технологи, зөгийн бэлчээрийг зохистой ашиглах, отор нүүдэл хийх, зөгийн өвөлжөө зоорийг зөв барих, түүнийг ашиглах арга барил, зөгийн балны мөшгөх системийн талаар мэдээлэл өгч, зөгийн бүлд нь үзлэг зөвлөгөө өгч, балт ургамлыг таних зэрэг мэдээллийг газар дээр нь өгч ажиллаж байна.
