Монголчууд эх орондоо “Хүнсний хувьсгал” хийхээр шийдээд жил гаруйн хугацаа /2022.05.13-2023.08.31/ өнгөрч байна. Тодруулбал 2022 оны 05 дугаар сарын 13-ны өдөр Монгол Улсын Ерөнхийлөгч У.Хүрэлсүх 19 гол нэр төрлийн хүнсний бүтээгдэхүүнээр дотоодын хэрэгцээгээ бүрэн хангаж, бүс нутагтаа экспортлогч улс болох зорилготой “Хүнсний хангамж, аюулгүй байдал” үндэсний хөдөлгөөнийг санаачлан, УИХ-ын индэр дээр зарлаж байв.
Тус үндэсний хөдөлгөөн эрчийг авч “Хувьсгал” болж өргөжиж, олон нийтийн дунд “Хүнсний хувьсгал” гэж нэрлэгдэх болсон. Нийгэм, танин мэдэхүйн аль нэгэн үзэгдлийн хөгжилд хүний хүчээр гарч буй гүнзгий өөрчлөлтийг хувьсгал гэж үздэг шиг монголчууд хүнс, хөдөө аж ахуйн салбартаа томоохон өөрчлөлт хийн, хөгжүүлж, мал аж ахуй, газар тариалан, үйлдвэр, үйлчилгээний салбараа хүчирхэгжүүлэх үйл хэрэг аль хэдийн ажил болж эхэлсэн.
Энэ хувьсгалын эрчинд хөндөгдөхгүй салбар гэж үгүй. Аливаа үйл хэрэг, ажлыг бүх шатны төрийн болон төрийн бус байгууллага, иргэд, аж ахуйн нэгжүүд хамтран хэрэгжүүлж болдог гэх шинэ жишгийг “Хүнсний хувьсгал” тогтоож байна. Санаачлаад орхидог, эхлүүлснээ дуусгадаггүй, хийсэн дүр эсгэдэг муу түүхүүд давтагдах ёсгүй. Давтахгүй байхаас ч өөр арга манай ард түмэнд, цаашлаад хүн төрөлхтөнд үлдээгүй.
Монголын ард түмэн өөрсдийгөө өлсөж үзээгүй, хэзээ ч өлсөхгүй ард түмэн гэж ярьдаг. Гэвч энэ аюул хаалга тогшиход бэлэн болжээ. Дэлхийн хүн ам хурдтай өсөхийн хэрээр өлсгөлөн нэмэгдэж, улс орнууд хүнсний тогтолцоогоо өөрчилж, хүнсээ нөөцөлж эхэллээ. Мөн сүүлийн жилүүдэд цар тахал дэгдэж, улс орнуудад геополитикийн асуудал хурцадсаны улмаас 829 сая хүн өлсгөлөнд нэрвэгджээ. Энэ цаг үед үйлдвэр, үйлчилгээ хөгжөөгүй, гадны улсаас хүнсээр хараат байдаг улсууд өндөр эрсдэлд орж байна. Үүний нэг улс бол бид, монголчууд юм. Нийт хүнснийхээ 90 орчим хувийг гаднын улсаас импортлон авч, 1 тэрбум ам.доллар гадагш урсгаж байгаа нь гуравхан сая хүн амтай манай улсад үндэсний аюулгүй байдлын хэмжээнд яригдах том эрсдэл болов.
Үүнээс урьдчилан сэргийлэх, хүнсээ, хүнээ хамгаалах боломж нь “Хүнсний хувьсгал” юм. Тиймээс Монгол Улсын Ерөнхийлөгчийн санаачилсан энэ ажлыг УИХ эрх зүйн орчныг нь бүрдүүлэх, Засгийн газар хэрэгжилтээр хангах, үйлдвэрлэгч, баялаг бүтээгчид эрүүл, аюулгүй хүнсээр ард түмнээ хангаж, үйлдвэрлэлээ хөгжүүлэх, олон улсын байгууллагууд төсөл хөтөлбөр хамтран хэрэгжүүлэх, эрдэмтэн судлаачид шинжлэх ухаанчаар хандаж, суурийг нь зөв тавихад туслан, банк, санхүүгийн байгууллагууд бага, хүүтэй, урт хугацаатай зээлийг баялаг бүтээгчдэд хүртээмжтэй олгоход дэмжлэг үзүүлж, “Хүнсний хувьсгал”-ын эрчинд хүч нэмцгээж байна.
Хэрэв монголчууд зорилгодоо хүрч эх орондоо хүнсний хувьсгал хийж чадвал дараагийн шатанд аж үйлдвэрийн хувьсгал эрчимжиж, хүнс, хөдөө аж ахуйн салбар гэлтгүй бусад бүх салбарт шинэ жишиг тогтон, хамтын хүчээр улс орон, ард түмнээ хамгаалах, хөгжүүлэх боломжийн суурь болно.
