Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөнийг аймаг бүр өөрийн онцлогт тулгуурлан хэрэгжүүлэн ажиллаж байна.

Баянхонгор аймаг хөдөө аж ахуй, газар тариалангийн салбараа дорвитой дэмжиж, үр дүнд чиглэсэн томоохон төсөл хөтөлбөрүүдийг амжилттай хэрэгжүүлж байгаа билээ.

Тодруулбал, ингэний сүүг үйлдвэрлэж эхлэх бэлтгэл нөхцөлөө ханган үйлдвэрийн тоног төхөөрөмжүүдээ тун саяхан хүлээн авч удахгүй угсархаар болсон. Мөн энэ ондоо багтаж 1000 тоннын мах ногооны зоорь, өвлийн хоёр хүлэмжийг ашиглалтад оруулах юм. Энэ зун газар тариалан эрхлэгчдээ дэмжин 100 хүлэмжийг нэг дор цогцоор байгуулсан зэрэг томоохон ажлуудыг Баянхонгор аймаг зохион байгуулан ажиллаж байна.

Тэгвэл 09 сарын 01-ний өдөр Баянхонгор сум, Өлзийт сумын газар тариалан эрхлэгчдийн үйл ажиллагааг дэмжиж УИХ-ын дарга Г.Занданшатарын дэмжлэгээр Шинэ хөдөө төслийн хүрээнд төмсний комбайныг аймгийн Засаг дарга Д.Мөнхсайхан, ХХААГ-ын дарга У.Балжинням нар хүлээлгэн өглөө.

Ургац хурааж авах тус комбайныг Баянхонгор болон Өлзийт сумын газар тариалан эрхлэгчид төмс хураалт бусад үйл ажиллагаандаа нэг жилийн хугацаанд үнэ төлбөргүйгээр хамтран ашиглах болно.

Засаг дарга Д.Мөнхсайхан: “Орон нутгийн өөрийн орлогыг нэмэгдүүлэх үүднээс үйлдвэрлэгч, бизнес эрхлэгчдээ бид тодорхой дэмжин ажилласаар ирлээ. Үр дүнг гаргах нь та бүхний эв зүй, хамтын ажиллагаа, санал санаачилгаас шууд хамаарна” гэдгийг хэлээд тариаланчдад аа амжилт хүсэв.

Ургац арвин байг ээ.