Мал эмнэлэг, үржлийн алба үүсэж хөгжсөний 100 жилийн ойн хурал Төрийн ордонд зохион байгуулагдаж байна. Арга хэмжээнд Монгол Улсын Ерөнхийлөгч Ухнаагийн Хүрэлсүх мэндчилгээ дэвшүүлснийг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр хуралд оролцогчдод уншиж танилцуулав.
МОНГОЛ УЛСЫН ЕРӨНХИЙЛӨГЧИЙН МЭНДЧИЛГЭЭНД:
Эрхэм хүндэт хатагтай, ноёд оо!
Хүндэт зочид оо!
Та бүхэнд Монгол Улсад орчин цагийн мал эмнэлэг, үржлийн алба үүсэж хөгжсөний түүхт 100 жилийн ойн баярын мэндийг өргөн дэвшүүлье!
Монгол Улсын Засгийн газрын 1923 оны 9 дүгээр сарын 07-ны өдрийн 32 дугаар тогтоолоор “Малын зүйлийг эмнэх ба боловсруулан сайжруулах газар” нэртэйгээр Мал эмнэлэг, үржлийн албыг анх байгуулсан түүхтэй.
Түүнээс хойш өнөөдрийг хүртэлх хугацаанд энэ “газар” үйл ажиллагаа, бүтэц, зохион байгуулалтаа хэдэнтээ өөрчилсөн бөгөөд Монгол улсын Засгийн газрын 2018 оны 267 дугаар тогтоолоор Засгийн газрын хэрэгжүүлэгч агентлаг “Мал эмнэлгийн ерөнхий газар” болж үйл ажиллагаа явуулж байна.
Монгол Улсын эдийн засаг, хөгжлийн тулгуур, хүн амын амьжиргааны гол эх үүсвэр болох мал аж ахуйн үйлдвэрлэлийн хөгжилд мал эмнэлэг, үржлийн алба чухал үүрэг гүйцэтгэж ирсэн юм.
Малын эмч, мал зүйчдийн үндсэн ажил болох мал, амьтны эрүүл мэндийг хамгаалах, малын ашиг шим, генетик чадавхыг нэмэгдүүлэх нь зөвхөн малын тухай асуудал биш, үндэсний аюулгүй байдал, нийтийн эрүүл мэнд, эдийн засгийн хөгжлийн чухал асуудал мөн юм.
Иймд төр засгаас мал эмнэлэг, мал үржлийн салбарт онцгой анхаарал хандуулж 2017 онд “Мал, амьтны эрүүл мэндийн тухай хууль”, “Малын генетик нөөцийн тухай хууль”-ийг Монгол Улсын Их Хурлаар соёрхон баталсан нь Монгол Улсын мал эмнэлэг, үржлийн салбарыг шинэчилж олон улсын жишигт нийцүүлэн хөгжүүлэх суурь тавигдсан гэдгийг цохон тэмдэглэж байна.
Үүний зэрэгцээ малын үржлийн ажил үйлчилгээг олон улсын түвшинд явуулах Малын удмын сангийн үндэсний төв шинэчлэгдэн байгуулагдаж, өндөр ашиг шимт малыг өсгөн үржүүлэх, ашиг шимийг нэмэгдүүлэх, малын генийн санг хамгаалах, баяжуулах, шинэ технологийг нэвтрүүлэх ажилд ахиц дэвшил гарсаар байна.
Түүнчлэн Монгол Улсын Ерөнхийлөгчөөс санаачлан УИХ-аас 2022 онд баталсан “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоол, УИХ-ын Байгаль орчин, хүнс, хөдөө аж ахуйн байнгын хорооны 2022 оны 04 дүгээр тогтоол, УИХ-ын түр хорооны 2023 оны 02 дугаар тогтоолоор малын гоц халдварт өвчинтэй тэмцэх цогц арга хэмжээг эрчимжүүлэх, био бэлдмэлийн дэвшилтэт технологи нэвтрүүлэх, вакцины хүйтэн хэлхээний сүлжээг бий болгох, мал эмнэлгийн оношилгооны лабораторийг чадавхжуулах, үйлчилгээний нэгжийн үйл ажиллагааг бэхжүүлэх, эрчимжсэн мал аж ахуйг дэмжин импортын хүнс орлох бүтээгдэхүүн үйлдвэрлэлийг нэмэгдүүлэх зэрэг бодлогын тодорхой шийдвэрүүд гарч, улс орны хэмжээнд хэрэгжиж байна.
Байгаль цаг уурын эрс тэс нөхцөлд дасан зохицсон, эрсдэлгүй мал аж ахуйг бий болгох, түүндээ тулгуурлан малын чанар, эрүүл мэндийг сайжруулан хамгаалах, ашиг шимийг нь нэмэгдүүлэх нь мал аж ахуйн хөгжлийн тулгуур асуудал мөн бөгөөд эдгээрийг шийдвэрлэхэд төр засаг, малчид, мал бүхий иргэд, аж ахуйн нэгж, боловсруулах үйлдвэрүүдийн хамтын ажиллагаа, ажлын харилцан уялдаа холбоо нэн чухал юм.
Та бүхний оюун ухаан, хүч хөдөлмөрөө зориулан ажилласан, одоо ажиллаж байгаа мал эмнэлэг, үржлийн алба нь боловсруулах үйлдвэрийг чанартай түүхий эдээр, хүн амыг баталгаат, аюулгүй хүнсээр хангах, экспортын шаардлага хангасан мах, махан бүтээгдэхүүн бусад түүхий эдийг нэмүү өртөг шингээн үйлдвэрлэх, үнэ цэнэ нь улам өсөн нэмэгдэх ирээдүйтэй салбар гэдэгт Төрийн тэргүүний хувьд итгэлтэй байна.
Мал аж ахуйн салбар бол манай улсын оршин тогтнохын үндэс, үндэсний аюулгүй байдлын дархлаа юм. Тиймээс энэхүү чухал салбарт эрдэм мэдлэг, хүч чадлаа зориулан ажиллаж буй үе үеийн мал зүйч, малын эмч, мэргэжилтнүүд, ажилтан албан хаагчид болон энд хүрэлцэн ирсэн зочид төлөөлөгчид Та бүхэнд Монгол улсын Ерөнхийлөгчийн хувиар чин сэтгэлийн талархал илэрхийлье.
Мөнх тэнгэрийн хүчин дор Монгол Улс мандан бадрах болтугай.
МОНГОЛ УЛСЫН ЕРӨНХИЙЛӨГЧ УХНААГИЙН ХҮРЭЛСҮХ
Улаанбаатар хот
2023 оны 12 дугаар сарын 05-ны өдөр