Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнийг эрчимжүүлэх зорилгоор батлагдсан УИХ-ын 36-р тогтоолыг хэрэгжүүлэгч төрийн байгууллагуудын хэрэгжилтийн тайланг нарийвчлан тооцох урьдчилсан хэлэлцүүлэг гурав дахь өдрөө үргэлжилж байна. Өнөөдрийн хэлэлцүүлэгт мал аж ахуйн үйлдвэрлэл болон хүнсний боловсруулах үйлдвэрлэлийн талаар холбогдох салбар яам, төрийн байгууллагуудын удирдлагууд, эрдэмтдийн зөвлөл, “Хүнсний хувьсгал” ТББ-ын төлөөллүүд оролцлоо.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ЕТГ-ын Хүнсний төсөл, хөтөлбөрийн албаны дарга А.Амаржаргал нар төлөвлөгөөний биелэлттэй танилцаж, холбогдох албаныхнаас тодруулга авлаа.
