Монгол Улсын эдийн засгийн гол тулгуур болсон Мал аж ахуйн салбар нь хүн амыг хүнсний бүтээгдэхүүнээр, хөнгөн үйлдвэрийг түүхий эдээр хангаж байдаг уламжлалт салбар. Малаас гарах ашиг шим хүнс болон хөнгөн үйлдвэрийг хөгжүүлэхэд чухал нөлөөтэй. Тиймдээ ч Монгол Улсын ерөнхийлөгч У.Хүрэлсүх “Хүнсний хангамж, аюулгүй байдал” хөдөлгөөний нэг зорилтдоо мал сүргээ эрүүлжүүлэх гэж тусгасан.

Энэ хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Эмээлт эко аж үйлдвэрийн парк” төслийн үйл ажиллагаатай танилцлаа. Уулзалтаар Эмээлт эко аж үйлдвэрийн парк НӨААТҮГ-ын захирал Б.Мягмар болон төслийн багийнхан төслийн үйл явц, хийх ажлуудаа танилцуулсан юм.

Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Монгол Улсын Ерөнхийлөгч У.Хүрэлсүх 2024 онд хөнгөн үйлдвэрийн салбарыг дэмжих чиглэлд анхаарч Хөнгөн үйлдвэрлэлийг хөгжүүлэх, нэмүү өртөг бүтээх, эцсийн бүтээгдэхүүн үйлдвэрлэлийг дэмжих чиглэлээр бодлого үйл ажиллагааны төлөвлөгөө болон санхүүжилтийн талаар санал боловсруулах ажлын хэсэг байгуулсан. Тиймээс “Эмээлт эко аж үйлдвэрийн парк” төслийн үр нөлөөг бид томоор харж байгаа. Тэнд малын гаралтай түүхий эдийг боловсруулах үйлдвэрүүд кластерийн системээр хөгжих боломжтой гэдэг нь маш чухал. Мөн арьс ширний үйлдвэрүүд Эмээлтрүү нүүснээр тэнд суурьшлын бүс үүснэ. Энэ их хотын төвлөрлөөс хэсэг нь ч гэсэн тэнд ая тухтай ажиллаж амьдрах нөхцөл бүрдэнэ гэж харагдаж байна. Тиймээс “Эмээлт эко аж үйлдвэрийн парк” төслийг урагшлуулахад бид хамтарч ажиллахад бэлэн.

Уулзалтын үеэр уламжлалт мал аж ахуй эрхэлж, ашиг шимийг нь хүртэж ирсэн орны хувьд малын гаралтай түүхий эдэд түшиглэсэн үйлдвэрлэлийг хөгжүүлэх, нэмүү өртөг шингэсэн эцсийн бүтээгдэхүүн үйлдвэрлэгч орон болох бүрэн боломжтойг талууд онцоллоо.