“Хүнсний хувьсгал” ТББ-аас Дэлхийн сүүний өдрийг тохиолдуулан “Сүү” ХК болон “Апу” ХК-тай хамтран Хүүхдийн урлан бүтээх төвд тоглогдож буй “Томоогүй тооройн адал явдал” жүжгийг үзэхээр ирсэн хүүхдүүдэд сүү, сүүн бүтээгдэхүүнээр бэлэг барилаа. “Сүү” ХК-ийн хувьд малчид, фермерүүдийн нийлүүлсэн хандивын сүүгээр хүүхдүүдэд зориулан сүү, зайрмаг үйлдвэрлэснээрээ онцлогтой юм. Мөн эцэг, эхчүүд болон хүүхдүүдэд сүүний ач холбогдлын талаар мэдээллэж, өдөр тутамдаа хэрэглэж байхыг зөвлөлөө.

ДЭМБ-ын 2010 оны судалгаагаар Монголчууд жилд хэрэглэх ёстой хэмжээнээс гурав дахин бага сүү, сүүн бүтээгдэхүүн хэрэглэдэг гэх статистик бий. Сүү, сүүн бүтээгдэхүүний хэрэглээ бага байгаагаас үүдэн шүдний өвчлөл, ясны сийрэгжилт, дархлаатай холбоотой өвчлөлүүд нэмэгдэх эрсдэлтэй байдаг.

Иймд Монгол Улсын Ерөнхийлөгчийн санаачлан хэрэгжүүлж буй “Хүнсний хувьсгал” үндэсний хөдөлгөөний хүрээнд 19 нэр төрлийн хүнсний бүтээгдэхүүнийг дотоодоосоо бүрэн хангах зорилт тавиад буй. Эдгээрийн дотор сүү, сүүн бүтээгдэхүүнүүд багтсан. Энэ дагуу сүүний үйлдвэрлэлийг нэмэгдүүлэх, сүүний фермийг хөгжүүлэх, малчдыг дэмжих чиглэлд олон ажлуудыг хийж хэрэгжүүлэн, үр дүнгээ өгсөөр байна.

“Хүнсний хувьсгал”-ын хүрээнд 2023 оны байдлаар сүүний үйлдвэрүүд 90 орчим тэрбум төгрөгийн зээл авсан бөгөөд, сүү хүлээн авах, боловсруулах хүчин чадал 40 орчим хувиар нэмэгдээд байна.