Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, БНСУ-ын Хангёны Үндэсний Их Сургуулийн төлөөллийг хүлээн авч уулзлаа. Уулзалтаар БНСУ-ын талаас Монгол Улсад ухаалаг хүлэмжийн аж ахуй болон мал аж ахуй, газар тариалан хөгжүүлэх цогцолбор байгуулах төслийн талаар танилцуулав.

“Ухаалаг хүлэмжийн аж ахуйн төв” байгуулах буцалтгүй хөрөнгө оруулалтын төсөл нь таван жилийн хугацаатай хэрэгжинэ. Төслийн хүрээнд:

• Уур амьсгалын өөрчлөлтөд дасан зохицох ухаалаг хүлэмж, газар тариалангийн технологийг хөгжүүлэх
• БНСУ-ын ICT технологийг нэвтрүүлэх, хүлэмжийн таримал ургамлын төрөл, чанарын стандартыг нэмэгдүүлэх
• ХХА-н бүтээгдэхүүний технологийн сургалтыг хийх замаар ухаалаг хөдөө, аж ахуйг нутагшуулах
• Фермерүүдэд газар тариалан эрхлэх технологийг эзэмшүүлж, салбарын аж ахуйн тоог нэмэгдүүлэх зэрэг ажлууд хийгдэх юм.

Ингэснээр Монгол улсын хүнсний аюулгүй байдлыг хангаж импортын урсгалыг багасган, Монгол Солонгосын хамтын ажиллагааг нэмэгдүүлэх ач холбогдолтой гэдгийг талууд онцоллоо.