Ургамал хамгааллын эрдэм шинжилгээний хүрээлэнгийн захирал М.Бямбасүрэн:
Ургамал хамгааллын эрдэм шинжилгээний хүрээлэн нь “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолын хүрээнд пестицидийн асуудлаар судалгаа, шинжилгээ хийн тогтоолын хэрэгжилтийг ханган ажиллаж байна. Монгол оронд тариалагддаг бүх төрлийн таримал ургамлыг өвчин, хортон, хөнөөлт шавж, мэрэгч амьтнаас хамгаалах дэвшилтэт арга технологиудын судалгааг хийж, бэлчээрийн хөнөөлт үлийн цагаан оготно, царцаатай тэмцэх биотехнологийн аргуудыг судлан монгол улсад нэвтрүүлэх чиглэлд анхаарч ажиллаж байна.
Монгол Улсад одоогийн байдлаар 150 нэр төрлийн пестицидийн үлдэгдлийн шинжилгээ хийж байгаа ч, энэ нь арав хүрэхгүй хувийг илрүүлдэг гэсэн үг юм.
Тиймээс дараагийн хоёр жилд пестицидийн эрсдэлийн судалгаа хийхэд шаардагдах лаборатори, тоног төхөөрөмжийг сайжруулах зөвлөмжийг боловсруулан цаашид 5000 хүртэлх төрлийн пестицидийг илрүүлдэг болох шаардлагатай байна. Хүнсний ногоо, жимс жимсгэнэд агуулагдах пестицидийн хэмжээг хил гааль дээр шалган худалдаанд гаргах хэрэгтэй.
Химийн бодисын хэмжээг сайн нягталж, шалгаагүй хилээр оруулаад худалдаанд шууд гаргасан үед хянах боломжгүй. Мөн газар тариалан, өрхийн хүлэмжийн аж ахуй эрхлэгчид гарал үүсэл, хаяг шошго нь тодорхойгүй химийн бодисыг зохисгүй, дур мэдэн хэрэглэснээр дараа нь гарах эрсдэлийг нэмэгдүүлж байна.
Манай улсын хортон ургамал, шавжтай тэмцэх бодисын хэрэглээ олон улстай харьцуулахад харьцангуй бага ч зохисгүй хэрэглээ их байгаа учраас аюулын түвшинд хүрээд байгаа юм.
Тиймээс бүх нийтийн боловсролыг дээшлүүлэх, сурталчлан таниулах сургалт, зөвлөгөөнийг тогтмол явуулах шаардлагатай байна.
Хүнсний хувьсгал хөдөлгөөний үр дүнд уг асуудлыг хөндөн эрдэмтэн судлаачдыг оролцуулж, шинжлэх ухаанчаар хандаж, судалгаа шинжилгээ хийж байгаа нь үр дүнтэй зөв шийдвэр болж байна. Уг судалгааны дүнд газар тариалан, хүлэмжийн аж ахуйд өргөн хэрэглэгддэг химийн пестицидийн хэрэглээг бууруулж, байгальд ээлтэй хүний эрүүл мэндэд сөрөг нөлөөгүй биологи, биотехнологийн үйлдвэрлэлийг хөгжүүлэх боломжтой.
