МҮХАҮТ-ын Ерөнхийлөгч Л.Төр-Од БНЛАУ-аас Монгол Улсад суугаа Элчин сайд Хунгээн Сугсавадтай уулзаж, хоёр орны эдийн засаг, бизнесийн хамтын ажиллагааны талаар ярилцав.
Хоёр орон эртний сайн, найрамдалт харилцаатай бөгөөд өндөр түвшний Төрийн айлчлал 2023, 2024 онд болсон билээ. Эдгээр айлчлалын хүрээнд байгуулсан санамж бичгийг бодитой болгоход ХАҮТ-уудын хамтын ажиллагаа чухал үүрэгтэйг Элчин Сайд Хунгээн Сугсавад онцлов.
Монгол, Лаос улсын Засгийн газар хоорондын 12-р комиссын хуралдаан Лаост саяхан болж, Зам тээврийн хөгжлийн сайд Б.Дэлгэрсайхан тэргүүтэй төлөөлөгчид оролцсон юм. Энэ бүрэлдэхүүнд МҮХАҮТ-ын Ерөнхийлөгч Л.Төр-Од багтаж, хоёр орны Танхимуудын хамтын ажиллагааг идэвхжүүлэх, бизнесийн боломжийг эрэлхийлэх чиглэлээр албаны хүмүүстэй уулзсан юм.
Лаосын бизнес эрхлэгчид Монголоос арьс шир, мах махан бүтээгдэхүүн, шимийн архийг зах зээлд нийлүүлэхэд бэлэн, Лаосын зах зээлээр дамжуулан АСЕАН-ы орнууд руу гаргах боломжтойг Элчин сайд Хунгээн Сугсавад тэмдэглэжээ.
Харин Лаос улсаас кофе, цай, будаа, жимс жимсгэнэ Монголын зах зээлд нийлүүлэх боломжтой юм.
Эх сурвалж: https://montsame.mn/mn/
