УИХ-ын Байгаль, орчин хүнс, хөдөө аж ахуйн байнгын хорооноос энэ сарын 27-нд хэвлэлийн хурал зохион байгуулж, намрын чуулганы хугацаанд хийсэн үйл ажиллагааныхаа талаар мэдээлэл өгөв.
Тус байнгын хороо эрхлэх асуудлынхаа хүрээнд 7, Аж үйлдвэржилтийн бодлогын байнгын хороотой хамтарсан хурал 2, нийт 9 удаа хуралдаж, 25 асуудал хэлэлцэн шийдвэрлэжээ. Байнгын хорооноос байгуулсан ажлын хэсэг 5, ажлын дэд хэсэг 8 удаа тус тус хуралдсан байна.
Мөн хугацаанд яам, агентлаг, харьяа байгууллагын 10 тайлан, мэдээлэл хэлэлцсэн шийдвэрлэж, Ерөнхийлөгчийн санаачилсан “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 2022 оны 36 дугаар тогтоолын хэрэгжилтийн талаар Хүнс, хөдөө аж ахуй, үйлдвэрийн яамны мэдээллийг сонссон аж.
Түүнчлэн Жижиг, дунд үйлдвэрийг хөгжүүлэх сангаас олгосон зээл, зээлийн эргэн төлөлт, хэрэгжилт, үр дүнтэй танилцаж, санал дүгнэлт гаргах үүрэг бүхий ажлын хэсгийг байнгын хорооны энэ оны 2 дугаар тогтоолоор байгуулжээ.
УИХ-ын гишүүн М.Мандхай, УИХ-ын даргын 42 дугаар захирамжаар хөдөө аж ахуйн үйлдвэрлэлийг дэмжих бодлогын хүрээнд байгуулсан Уламжлалт мал аж ахуйд тулгамдаж буй уур амьсгалын өөрчлөлтөөс шалтгаалсан сөрөг нөлөөллийг бууруулах тухай хууль, Шинэ сэргэлтийн бодлогод туссан зорилт, “Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 2022 оны 36 дугаар тогтоол, “Малын гаралтай түүхий эдийг боловсруулах үйлдвэрлэлийг дэмжих зарим арга хэмжээний тухай” УИХ-ын 2024 оны 63 дугаар тогтоолын хэрэгжилтийг эрчимжүүлэх, үр нөлөөг дээшлүүлэх бодлого, арга зүйн дэмжлэг үзүүлэх, хяналт тавих, холбогдох арга хэмжээний санал болон хууль, эрх зүйн орчныг боловсронгуй болгох асуудлыг судалж, танилцуулах үүрэг бүхий ажлын хэсэг 8 удаа, дэд хэсэг 3 удаа тус тус хуралдсан. Хөдөө аж ахуйн чиглэлийн гурван том хөдөлгөөнийг эрчимжүүлэх чиглэл бүхий ажлын хэсэг хууль, эрх зүйн орчин дахь зураглалыг хийж, малчид хоршоологчдод мэдээлэл хүргэн, гишүүдийг чадавхжуулж, тулгамдаж буй асуудлыг шийдвэрлэх зэргээр өргөн хүрээнд шуурхай ажиллаж буйгаа тайлагнав.
Эх сурвалж: Монцамэ агентлаг
