Завхан аймгийн Шилүүстэй сумын малчид энэ жил өнөтэй өвөлжиж байна.
Завхан аймгийн урд бүсийн Отгон, Шилүүстэй суманд аймгийн Засаг дарга Г.Өнөрбаяр, аймгийн Онцгой байдлын газрын дарга, хурандаа Ө.Болд, Хүнс, Хөдөө аж ахуйн газрын дарга Ч.Мөнххүрэл нар ажиллаж өвөлжилтийн нөхцөл байдалтай танилцжээ.
-Цас бага орсон тул Шилүүстэй суманд өнтэй жил болж байна. Энэ жил сумаас малчид гадагшаа нутагт оторт яваагүй онцлогтой. Харин тус сумын нутагт Баянхонгор аймгийн Гурванбулаг, Завхан аймгийн Отгон зэрэг сумаас 7,000 гаруй толгой мал отроор өвөлжиж байна.
Шилүүстэй сумын 451 өрхийн 89.8 мянган толгой мал нутагтаа өвөлжиж хаваржиж байна. Энэ жил аюулгүйн нөөцдөө 30 тонн тэжээл, 20 тонн өвс, малчид 223 тонн өвс бэлтгэсэн байна гэж Шилүүстэй сумын Засаг дарга Ш.Түвшинбат ярилаа.
Отгон сумын малчдад аймгийн аюулгүйн нөөцөөс өвс өгөхөөр болжээ
Энэ жил Отгон суманд цас их орж, зарим газартаа шуурч хатуурсан нөхцөл байдалтай хаваржилт хүндрэх төлөвтэй байна.
Отгон сумын 6 багт нийт 168 малчин өрх өвөлжиж байна. Баянбулаг, Буянт багт өвөлжилт хүндэрч, Завхан аймгийн Шилүүстэй, Алдархаан, Идэр, Баянхонгор аймгийн Гурванбулаг, Хүрээмарал, Говь-Алтай аймгийн Дэлгэр суманд 32 малчин өрхийн 42 мянган мал оторлож байна.
Аймгийн Засаг даргаар ахлуулсан ажлын хэсэг тус сумын Баянбулаг багийн Ар элстэй, Баян-Улаан, Өвөр элстэй хэмээх газар өвөлжиж буй малчин Б.Лхагвасүрэн, Л.Энхсайхан, Я.Бямбаноров нарын хотонд очиж өвөлжилтийн нөхцөл байдалтай танилцаж малчдын санал хүсэлтийг сонссон.
Отгон суманд цас ихтэй зарим газартаа шуурч хатуурсан, малын идэш муу байгаа тул хаваржилт хүндрэх нөхцөл байдалтай байна. Тиймээс өвсний дэмжлэг үзүүлэхийг малчид хүсэж, аймгийн нөөцөөс малчдад өвс олгохоор боллоо.
Отгон сум 1,600 боодол өвс, 7.5 тонн тэжээл, 5 тонн улаан буудай аюулгүйн нөөцдөө бэлтгэсэн. Гэсэн хэдий ч энэхүү нөөц нь малчдад хүрэлцэхээргүй байгааг сумын Засаг дарга Б.Бат-Оргил ажлын хэсгийнхэнд дуулгалаа.
Аймгийн Засаг даргаар ахлуулсан ажлын хэсэг үргэлжлүүлэн өвөлжилт хүнд байгаа, зудын эрсдэлтэй үнэлэгдсэн сумуудад ажиллах юм гэж Завхан аймгийн ЗДТГ-аас мэдээлэв.
Баян-Улаан, Өвөр элстэй хэмээх газар өвөлжиж буй малчин Б.Лхагвасүрэн, Л.Энхсайхан, Я.Бямбаноров нарын хотонд очиж өвөлжилтийн нөхцөл байдалтай танилцав
Эх сурвалж: https://montsame.mn/mn/read/360765