Монгол Улсын Ерөнхийлөгчийн санаачилгаар 2022 оны 12 дугаар сараас эхлэн хэрэгжиж байгаа “Хүнсний хувьсгал” үндэсний хөдөлгөөний хүрээнд хүнс болон хөдөө аж ахуйн чиглэлээр үйл ажиллагаа явуулах хүсэлтэй иргэд, аж ахуйн нэгжүүд нэмэгдэж байна.
Орхон аймгийн хэмжээнд энэ чиглэлээр үйл ажиллагаа явуулдаг 125 талх нарийн боов, цагаан идээ, усны үйлдвэр, мах махан бүтээгдэхүүн боловсруулдаг аж ахуйн нэгж байдаг. Зарим үйл ажиллагаа нь жигдэрсэн “Ивээлт сүү” “Орда хүнс”, “Энхбүтэмж” зэрэг Эрдэнэтийн хэрэглэгчддээ олон жил хангаж ирсэн байгууллагууд ч байна.
Эдгээр байгууллагыг Засгийн газраас бодлогоор дэмжин 2023 оноос эхлэн 5 хувийн хүүтэй зээлийг банкаар дамжуулан олгодог. Аймгийн хэмжээнд 2023 онд 10 аж ахуйн нэгжид 2,4 тэрбум төгрөгийн зээл олгосон бол 2024 онд 3 аж ахуйн нэгжид 900 сая төгрөгийн зээл олгожээ.
“Хүнсний хувьсгал” үндэсний хөдөлгөөн 2022-2026 он хүртэл үргэлжлэх бөгөөд энэ чиглэлийн үйлдвэрүүд тоног төхөөрөмжийн шинэчлэлийг тогтмол хийсээр байна.
Мөн аймгийн хэмжээнд хүнс, хөдөө аж ахуйн чиглэлийн үйлдвэрлэл нэмэгдэж буй бөгөөд өнөөдрийн байдлаар шимийн архины уламжлалт аргаар нэрэн гаргасан Эрдэнэтийн шинэ брэнд “Зэсүй”-г жижиг, дунд үйлдвэрлэл эрхлэгч Л.Эрдэнэтуяа санаачлан гаргаж худалдаанд гаргахад бэлэн болжээ.
“Зэсүй” брэнд нь үй олон зэс гэсэн утга агуулга бүхий нэршилтэй, зэс лац ломбо бүхий зэсэн тагш, хундагатайгаар бүтээжээ.
Эх сурвалж: Монцамэ агентлаг