Бүсчилсэн хөгжлийн үндэсний хорооны 2025 оны ээлжит хуралдаан өнөөдөр Төрийн ордонд боллоо. /2025.02.03/
Хуралдаанаар Үндэсний хорооны 2024 оны үйл ажиллагааны төлөвлөгөөний биелэлт, 2025 онд хэрэгжүүлэх үйл ажиллагааны төлөвлөгөөний талаар хэлэлцэв. Монгол Улсын Шадар сайд, “Бүсчилсэн хөгжлийн үндэсний хороо”-ны дарга С.Амарсайхан “Бүсчилсэн хөгжлийг хэрэгжүүлэх арга хэмжээний төлөвлөгөө”-ний биелэлтийг ханган ажиллахыг Үндэсний хорооны гишүүд аймаг, нийслэлийн удирдлагуудад үүрэг болголоо.
Тэрбээр хуралдааныг нээж хэлсэн үгэндээ “Монгол Улсын Засгийн газраас 2024 оныг Бүсчилсэн хөгжлийг дэмжих жил болгон зарласны хүрээнд бодлого тодорхойлох, аймаг, нийслэлийн хэмжээнд эрчимжүүлэх, эдийн засгийн өсөлтийг тэлэх, хувийн хэвшил, иргэдийн оролцоог хангах, татварын бодлогоор дэмжих зэрэг бодлого, зорилтууд гараанаас гарч байна. Энэ онд Бүсчилсэн хөгжлийн реформыг хэрэгжүүлэх зорилгоор олон ажил, арга хэмжээ төлөвлөсөн” гэдгийг тодотголоо.
Хуралдаанд Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхий сайдын Эдийн засгийн бодлогын зөвлөх Д.Ирмүүн нар болон Үндэсний хорооны гишүүд, бусад албаныхан оролцлоо.
Мөн Бүсчилсэн хөгжлийн реформыг Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөнтэй нягт уялдуулан, цаашид хамтран ажиллахаар төлөвлөжээ.
Бүсчилсэн хөгжлийн үндэсний хүрээлэнгийн захирал Д.Эрдэнэбаяр “Бүсийн хамтын ажиллагааг дэмжих, идэвхжүүлэх олон талт арга хэмжээг зохион байгуулах” ажлын дэлгэрэнгүй төлөвлөгөөг танилцууллаа.
Нийтдээ гурван зорилгын хүрээнд 11 арга хэмжээ төлөвлөжээ.
Үүнд:
- Бүсийн тэргүүлэх чиглэлийг дэмжсэн татвар, хөрөнгө оруулалтын эрх зүйн таатай орчныг бүрдүүлэх бодлогын санал зөвлөмжийг боловсруулах
- Засгийн газрын 2024-2028 оны үйл ажиллагааны хөтөлбөрийн хүрээнд хэрэгжүүлэхээр төлөвлөсөн салбарын бүтээн байгуулалтыг эрчимжүүлэх
- Салбарын зорилт, арга хэмжээг бүс бүрээр нь тодорхойлох
- Төсөл, арга хэмжээний ТЭЗҮ, зураг төслийг хийж гүйцэтгэх
- Засгийн газрын өргөтгөсөн хуралдааныг тухайн бүсэд зохион байгуулж, бүсийн хөрөнгө оруулалтын төсөл хөтөлбөрүүдийг орон нутгийн иргэд, хөрөнгө оруулагчдад танилцуулах
- Салбар хоорондын болон гадаад хамтын ажиллагаа, түншлэлийг өргөжүүлэх ажлыг зохион байгуулах
- Салбар хоорондын уялдааг хангах, урт хугацаанд хэрэгжүүлэх төсөл, арга хэмжээний хэрэгжилтийг хянах орон зайн төлөвлөлт, гүйцэтгэл, хяналт, удирдлагын нэгдсэн цахим платформыг хөгжүүлж, олон нийтэд хүргэх зэрэг ажлыг хэрэгжүүлэх юм байна.
