НҮБ-ын Хүүхдийн Сангаас хүүхэд залуучуудад эрүүл хоол, хүнсний орчинг бүрдүүлэх зорилгоор “Fix My Food” олон улсын аяныг эхлүүлжээ. Тус аяны хүрээнд нийслэлийн 10 сургуулийн хүнсний орчин, сурагчдын хэрэгцээ, сэтгэл ханамжийн байдлын талаар хүүхдүүд өөрсдөө хийсэн ЕБС-ийн хоол тэжээлийн орчны үнэлгээний дүнг танилцуулах уулзалт боллоо. Уулзалтад Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон Монголын Хүүхдийн Зөвлөл, Хүнс Хөдөө Аж Ахуй Хөнгөн Үйлдвэрийн яам, Сангийн Яам, Боловсролын яам, Нийслэлийн боловсролын газрын холбогдох албаныхан оролцлоо.
Уг аяныг Английн “Bite Back” төрийн бус байгууллага санаачлан хэрэгжүүлж эхэлсэн бөгөөд эл олон улсын аяныг Монгол Улсаас эхлүүлж буй. Тус аяныг Азийн найман улсад өрнүүлэх бөгөөд эрүүл зөв хооллолт, түргэн хоолны хор хөнөөлийн талаар ерөнхий боловсролын сурагчдад сурталчлан таниулах зорилготой юм.
ЭМЯ, НЭМҮТ, НҮБ-ын Хүүхдийн Сангаас хамтран монгол хүүхдийн илүүдэл, жин, таргалалтын сэргийлэлтэд өргөн хүрээний дүн шинжилгээ, судалгаа явуулжээ.
Судалгаагаар манай улсын хүүхэд, өсвөр насныхны дунд илүүдэл жин, таргалалтын тархалт эрчимтэй нэмэгдэж байгааг онцолсон байна. Илүүдэл жинтэй хүүхэд доромжлол, сэтгэл гутрал, түгшүүрт илүү өртөж, өөрийгөө дорд үзэх хандлагатай байдаг байна. НҮБ-ын Хүүхдийн сангийн хувьд хүүхдийн хоол тэжээлийн байдлыг сайжруулах, таргалалтаас урьдчилан сэргийлэхэд хүнсний орчныг сайжруулах 4 арга хэмжээг үр дүнтэй гэж үздэг:
Үүнд:
- эрүүл бус хүнсний зар сурталчилгаанаас хүүхдийг хамгаалах
- чихрийн хэрэглээг бууруулах
- хүнсний шошгололтын мэдээллийг сайжруулах
- сургууль, цэцэрлэгийн хүнсний орчинг сайжруулах, эрүүл хүнсээр хангах
Уулзалтын үеэр Монголын Хүүхдийн Зөвлөлийн гишүүн Г.Бөртэ танилцуулсан илтгэлдээ:
Монгол Улс сургуулийн хоол, хүнсний орчныг сайжруулах чиглэлээр нилээдгүй арга хэмжээ авдаг орны тоонд ордог. “Fix My Food” аяны хүрээнд Монголын Хүүхдийн Зөвлөлийн гишүүд Нийслэлийн арван сургуульд хоол тэжээлийн орчны судалгааг явуулсан.
Судалгааны дүнгээс харвал сургуулийн гадна болон дотор орчны хоол хүнсний нэгдсэн стандарт, хяналт шалгалт хамгийн их дутагдаж байна.
Зарим сургуулийн 150м радиус дотор үйл ажиллагаа явуулдаг хүнсний дэлгүүрүүд газтай болон чихрийн агууламж өндөртэй ундааг аягалан зарж байна. Ингэхдээ нэг аяга ундааг 1000 төгрөгөөр зарж байгаа юм. Мөн үдийн цай хөтөлбөрөөр бага ангийн сурагчдад өгдөг хоол нь өдөрт авах ёстой шим тэжээлийн шаардлагагыг хангахгүй байна. Цаашид дараах зөвлөмжийн дагуу ажиллах шаардлагатай гэж үзэж байна.
Үүнд:
- Эрүүл мэндийн хичээлийн сургалтын чанарыг сайжруулах, сургалтын хэрэглэгдэхүүнийг нэмэгдүүлэх,
- Сургуулийн эргэн тойронд хүнсний дэлгүүр, түргэн үйлчилгээний цэгүүдэд хадгалалтын горим зөрчсөн, чихэр, тосны агууламж өндөр хоол, хүнсний бүтээгдэхүүн худалдаалж байгаа тул хяналтыг сайжруулах,
- Дунд, ахлах ангийн сурагчид эрүүл, тэнцвэртэй хооллох талаар мэдлэгтэй болж байгаа хэдий ч сургуулийн орчинд хооллох нөхцөл бүрдээгүй,
- Сурагчдын эцэг эх, асран хамгаалагчид хоол, хүнсний бүтээгдэхүүн худалдан авахад зориулж мөнгө өгдөг хэдий ч шинэ ногоо, жимс, сүү сүүн бүтээгдэхүүн зэрэг шим тэжээллэг хоол хэрэглэх боломж бүрдээгүй,
- Өсөлт хөгжлийн эрчимтэй үе болох дунд, ахлах ангийн сурагчдын хооллолтын асуудлыг шийдвэрлэх шаардлагатай гэсэн дүгнэлтэд нэгдлээ.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр:
Чихрийн агууламж өндөртэй ундааг аягалж зарж байгаа нь хүнсний бүтээгдэхүүний аюулгүй байдлыг хангахад шаардагдах ариун цэвэр, эрүүл ахуйн тухай хууль зөрчсөн ноцтой асуудал.
Бид “Хүнсний хувьсгал” үндэсний хөдөлгөөний хүрээнд өнгөрсөн 2,5 жилийн хугацаанд дотоодын хүнсний бүтээгдэхүүний хангамжийг шийдэхийн тулд 3200 гаруй том, жижиг төслүүдэд бага хүүтэй, урт хугацаатай зээл олгоод байна. Одоо бид хүнсний аюулгүй байдалд анхаарал хандуулан ажиллаж байна. Энэ хүрээнд Ерөнхий боловсролын сургуулиудын хоол, хүнсний асуудлыг чухалчлан авч үзэж, цаашид дотоодын хүнс үйлдвэрлэгчидтэй хамтран монгол хүүхдийг монгол хүнсээр хангах үндэсний хэмжээний томоохон ажлыг хийж хэрэгжүүлнэ.
