Зудын эрсдэлийн үнэлгээгээр Дархан-Уул аймгийн хэмжээнд өвөлжилт цагаанаар зудархуу гэж үнэлэгдсэн байна. Өнгөрсөн 10 хоногт орсон цас, цасан шуурганаас үүдэн цас хатуурч малчид өөрсдийн бэлдсэн өвс, тэжээлийн нөөцийн 50-70 хувийг хэрэглэжээ.
Иймд аймгийн Онцгой комиссын хэсэгчилсэн хуралдаан өнөөдөр болж, малчдад өвс тэжээл олгох талаар хэлэлцлээ.
Хуралдаанаар хавар урт болох төлөвтэй байгаа тул сум, аймгийн өвс, тэжээлийн аюулгүйн нөөцийг гаргах болоогүй гэж үзлээ.
Харин аймгийн Засаг даргын нөөц хөрөнгөөс 5000 боодол өвс худалдан авч малчдад үнэгүй тараахаар шийдвэрлэв.
Нийт малчдын 70 хувь нь Хонгор суманд өвөлждөг бөгөөд тус суманд 3000 боодол, Шарын гол, Орхон, Дархан сумын малчдад 2000 боодол өвсийг энэ баасан гарагт тараахаар боллоо.
Аймаг, сумдын аюулгүй нөөцөд аймаг 100 тонн өвс, 50 тонн тэжээл, сумд 40 тонн өвс, 25 тонн тэжээл бэлтгэсэн байна.
Ус, цаг уур, орчны шинжилгээний газрын мэдээллээр өнгөрсөн 10 хоногийн байдлаар цасны дундаж зузаан Дархан суманд 25 см, Орхон суманд 24 см, Шарын гол суманд 23 см, Хонгор суманд хамгийн их буюу 30 см зузаан цастай байна.
Аймгийн нийт нутгаар цасны дундаж зузаан 10-14 см, дундаж нягт 0.17-0.22 гр см куб байна.
Эх сурвалж: Монцамэ агентлаг