Сайншанд сумын ЗДТГ, БНСУ-ын Умард Чүнчон мужийн Ёндун хошуутай хамтран ажиллах санамж бичиг байгууллаа.
Сумын ИТХ-ын дарга М.Буяндэлгэр, Засаг дарга Ч.Түвшинтөгс болон холбогдох албаныхан Ёндун хошууны ЗДТГ, ИТХ-ын төлөөлөгчдийг энэ сарын 17-нд хүлээн авч уулзан, сум орны хөгжил дэвшил, хөрөнгө оруулалт, онцлог зүйлсийн талаар мэдээлэл өгч харилцан санал солилцжээ.
Талууд эдийн засаг, хөдөө аж ахуй, аялал жуулчлал, соёлын салбар болон улирлын чанартай ажилтны солилцоог хөгжүүлэх, бусад салбарт хамтран ажиллахаар санамж бичигт тусгасан байна. БНСУ-ын Ёндун хошуу нь байгалийн өвөрмөц тогтоцтой, үржил шимтэй хөрстэй тул газар тариалан эрхлэхэд тохиромжтой нутаг юм.
Тус хошуунд усан үзэм, тоор, алим гэх зэрэг чихэрлэг жимс ихээхэн ургадаг. Тиймээс дарсны үйлдвэрлэлээрээ улсдаа тэргүүлдэг төдийгүй үнэр, амт оруулагчгүй байгалийн органик дарсыг үйлдвэрлэлдээ нэвтрүүлж зах зээлд нийлүүлдэг байна.
Эх сурвалж: Монцамэ агентлаг
