Монгол Улсын Ерөнхийлөгчийн Тамгын газрын захирамжийн дагуу байгуулагдсан “Хүнсний хувьсгал”-ын дэргэдэх эрдэмтдийн зөвлөлийн VI хуралдаан боллоо. Тус хуралдааныг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр нээж үг хэллээ.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас баталсан 36-р тогтоол болон хэрэгжүүлэх арга хэмжээний төлөвлөгөөг шинжлэх ухаан, технологийг хөгжүүлэх бодлого, тэргүүлэх чиглэл, түүний үр дүнтэй нь уялдуулан хэрэгжүүлэхэд дэмжлэг үзүүлэх чиг үүрэгтэй эрдэмтдийн зөвлөл байгуулагдаад багагүй хугацаа өнгөрч байна. Богино хугацаанд үр дүнтэй ажиллахын тулд Эрүүл мэндийн яам, Хүнс, хөдөө аж ахуй, хөнгөн үйлдвэрийн яам болон Лабораториудын эрдэмтдийг татан оролцуулж, эрдэмтдийн зөвлөлийн цар хүрээг тэлж, 28 эрдэмтэн судлаачидтай хамтран ажиллаж байна.
УИХ-ын 36-р тогтоолыг хэрэгжүүлэгч төрийн 35 байгууллагаас томилогдон ажиллаж байгаа Ажлын хэсэгт хүнс, хөдөө аж ахуйн салбарын эрдэмтдийг оролцуулж, салбарын боловсон хүчнийг нэмэгдүүлэн чадавхжуулж, шинэ төсөл, хөтөлбөр хэрэгжүүлэхэд анхаарна.
Мөн энэ удаагийн хуралдаанаар 2023-2024 онд хийгдсэн ажлын тайлан, үр дүнтэй танилцаж, 2025 онд хийж хэрэгжүүлэх үйл ажиллагааны төлөвлөгөөг боловсруулах Ажлын хэсгийг байгууллаа.
Цаашид Ерөнхийлөгчийн Тамгын газар, “Хүнсний хувьсгал” мэргэжлийн холбоо болон Эрдэмтдийн зөвлөлийн үйл ажиллагааг нягт уялдуулан ажиллахаар төлөвлөж байна.
