Төвийн бүс буюу Сэлэнгэ, Дархан-Уул, Төв аймагт жижиг, дунд үйлдвэрийг хөгжүүлэх сангаас 2025 онд хөнгөлөлттэй зээл олгох салбар чиглэл батлагдаж төслөө хүлээн авч эхэлжээ.
Монгол Улсын Засгийн газрын 113 дугаар тогтоолоор батлагдсан “Жижиг, дунд үйлдвэрийг хөгжүүлэх сангаас хөнгөлөлттэй зээл олгох, сонгон шалгаруулах, дамжуулан зээлдүүлэх, эргэн төлүүлэх, хяналт тавих журам”-ын дагуу бичил үйлдвэр, үйлчилгээ эрхлэгчийн зээлийн хүсэлт хүлээн авах үйл ажиллагаа энэ 10-ны өдрөөс эхлээд байна.
ХХААХҮ-ийн Сайдын баталсан хөнгөлөлттэй зээл олгох Ерөнхий нөхцөл, салбар, чиглэлийн дагуу хүлээн авах бөгөөд бичил ангилалд хамаарах жижиг, дунд үйлдвэр, үйлчилгээ эрхлэгчдийн ирүүлсэн төслийг Жижиг, дунд үйлдвэрийн газар болон Дархан-Уул, Сэлэнгэ, Төв аймгийн Хүнс, хөдөө аж ахуйн газар сонгон шалгаруулна.
Төслийг 2 дугаар сарын 10-ны өдрөөс 3 дугаар сарын 12-ны өдрийг хүртэл хүлээн авах бөгөөд төслийн материалыг зөвхөн www.sme.gov.mn цахимаар хүлээн авах юм.
5 хүртэл жилийн хугацаанд олгох уг зээлийг хэд хэдэн тодохой чиглэлүүдэд олгох юм байна. Тодруулбал:
-Шинэ сэргэлтийн бодлогын хүрээнд хотоос орон нутагт шилжин үйлдвэр, үйлчилгээ эрхлэгч аж ахуйн нэгж, орон нутагт шилжсэн иргэнийг ажилд авсан үйлдвэр, үйлчилгээ эрхлэгч аж ахуйн нэгж;
-Импортыг орлох шинэ бүтээгдэхүүн үйлдвэрлэл;
-Экспортод чиглэсэн кластерын үйлдвэрлэл;
-Баяжуулсан болон органик бүтээгдэхүүн үйлдвэрлэл;
-Инновацийн бүтээгдэхүүн нэвтрүүлэх;
-Хүнсний түүхий эдийн бэлтгэн нийлүүлэлтийн сүлжээнд оролцогч;
-Уул уурхайн ханган нийлүүлэлт;
-Зам дагуух тохилог үйлчилгээг нэвтрүүлэх;
-Цагаан алт хөдөлгөөн;
-Атар-4 тариалангийн тогтвортой хөгжлийн аян;
-Шинэ хоршоо хөдөлгөөн зэрэгт олгох юм.
Эх сурвалж: Монцамэ агентлаг