Азийн хөгжлийн банкны санхүүжилтээр хэрэгжүүлж буй “Аймаг, сумдын бүсчилсэн ногоон хөгжлийн хөрөнгө оруулалтын хөтөлбөр”-ийн Төслийн удирдах хорооны гишүүнээр Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ажиллахаар болсон. Төслийн удирдах хорооны гишүүнд төслийг танилцуулах уулзалт Эдийн засаг, хөгжлийн яаманд боллоо. Төслийг ЭЗХЯ-ны Хяналт Шинжилгээ Үнэлгээний газрын дарга, Төслийн Гүйцэтгэх захирал Ж.Өнөржаргал, Төслийн Ерөнхий зохицуулагч Н.Тэгшбаяр /Доктор/ нар танилцууллаа.

Аймаг, сумын бүсчилсэн ногоон хөгжлийн хөрөнгө оруулалтын хөтөлбөр нь “Хүнсний хангамж, аюулгүй байдлыг хангах талаар авах зарим арга хэмжээний тухай” Улсын Их Хурлын 36 дугаар тогтоол болон “Шинэ сэргэлтийн бодлого”-ын “Хот, хөдөөгийн сэргэлт” гэсэн Монгол Улсын дунд хугацааны бодлогын баримт бичгүүдтэй нягт нийцэж байгаа бөгөөд хүнсний 19 гол нэр төрлийн бараа бүтээгдэхүүнийг дотооддоо үйлдвэрлэдэг болоход чухал ач холбогдолтой юм.

Мөн уг хөтөлбөр нийт 735 сая $-ийн төсөвтэй төлөвлөгдсөн бөгөөд 17 аймгийн 50 гаруй сумдад хэрэгжих юм. Ингэхдээ, уур амьсгалын өөрчлөлтөд дасан зохицох чадвартай, нүүрсхүчлийн хийн ялгарал багатай, хүн ам амьдрахад таатай хот, суурин газар байгуулж, малын түүхий эд, мах, сүүн бүтээгдэхүүний чанарыг дээшлүүлэн экспортод гаргах зорилготой.

Тус хөтөлбөр нь дараах үе шаттайгаар хэрэгжинэ.

• Үе шат I /2024-2029 он/
• Үе шат II /2026-2030 он/
• Үе шат III /2028-2033 он/

“Аймаг, сумдын бүсчилсэн ногоон хөгжлийн хөрөнгө оруулалтын хөтөлбөр”-ийн Төслийн удирдах хорооны гишүүд Монгол Улсын Ерөнхийлөгчийн санаачилсан “Хүнсний хувьсгал”, “Цагаан алт”, Атар-4″, “Шинэ хоршоо” зэрэг үндэсний хөдөлгөөнүүдтэй нягт уялдан хамтарч ажиллана гэдгээ илэрхийллээ.