Бүсчилсэн хөгжлийн үндэсний хүрээлэнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон ЕТГ-ын Хүнсний төсөл, хөтөлбөрийн алба, ЕТГ-ын дэргэдэх Эрдэмтдийн зөвлөл, “Хүнсний Хувьсгал” мэргэжлийн холбооны төлөөллүүд ажиллаж бодлого, үйл ажиллагаатай танилцлаа.
Монгол Улсын Бүсчилсэн хөгжлийн бодлогын хүрээнд Засгийн газрын 2025 оны 1 сарын 14-ний хуралдаанаар “Бүсчилсэн хөгжил хөдөлгөөн”-ийг орон даяар өрнүүлэх шийдвэр гарсан. Түүнчлэн Бүсчилсэн хөгжлийн реформыг хэрэгжүүлэхдээ Монгол Улсын Ерөнхийлөгчийн санаачилсан “Хүнсний хувьсгал”, “Цагаан алт”, “Шинэ хоршоо” үндэсний хөдөлгөөнтэй нягт уялдуулан, хамтран ажиллахыг Монгол улсын Шадар сайд А.Амарсайхан онцолсон.
Бүсчилсэн хөгжлийн үндэсний хүрээлэнгийн Захирал Д.Эрдэнэбаяр, БХҮХ-ийн Бүс, орон нутгийн судалгаа, мэдээллийн газрын дарга А.Чулуунчимэг болон холбогдох албаныхан “Бүсийн хамтын ажиллагааг дэмжих, идэвхжүүлэх хөдөлгөөн өрнүүлэх, олон талт арга хэмжээг зохион байгуулах” ажлын дэлгэрэнгүй төлөвлөгөөг танилцууллаа.
“Бүсчилсэн хөгжлийн” бодлогыг гол зорилго нь Бүс, орон нутгийн онцлогт тулгуурлан, бүтээгдэхүүнийг төрөлжүүлэн хөгжүүлэх, хөдөө орон нутгийн иргэдийн орлогыг нэмэгдүүлэх, нэмүү өртөг шингэсэн үйлдвэрлэлийг дэмжих, тухайн орон нутагтаа таатай амьдрах нөхцөл боломжийг бүрдүүлэх юм. Мөн 7 бүсийн хамтын ажиллагааг дэмжих, идэвхжүүлэх хөдөлгөөн өрнүүлэх, олон талт арга хэмжээг хэрэгжүүлснээр эдийн засаг, нийгмийн хөгжлийн тэнцвэртэй байдал хангагдан, хүн амын бүтэц, суурьшилт төлөвлөлтөд эерэг өөрчлөлт гарч, газар нутгийн онцлог, орон нутгийн нөөц боломжид тулгуурласан бие даасан өсөлтийг бий болгох юм. Нөгөөтээгүүр бүс нутгуудын хүнсний хангамж, хүнсний аюулгүй байдлыг хангахад газар зүйн байдлаар нь бүсчлэх шаардлагатай.
Бүс, орон нутгийн хамтын ажиллагааны хүрээнд:
- Баруун бүс- 2025.03.21
- Хангайн бүс- 2025.03.28
- Хойд бүс- 2025.04.11
- Төвийн бүс- 2025.04.18
- Зүүн бүс- 2025.05.02
- Говийн бүс- 2025.05.09
- Улаанбаатар- 2025.06.01-06.30 бүсүүдэд ажиллана.
Мөн гадаадын хөрөнгө оруулалтыг нэмэгдүүлэх, бүс нутгийн хөгжлийг сурталчлах, аялал жуулчлалыг дэмжих, соёл, түүхээ олон улсад таниулах, төрийн үйлчилгээг хялбаршуулах зорилготой Бүсчилсэн хөгжлийн виртуал систем /Go vision метаверс бодлого/-ийг гадаад, дотоодын хөрөнгө оруулагчид болон олон нийтэд танилцуулахаар бэлтгэн хөгжүүлжээ. Ингэснээр тухайн бүс нутгийн онцлог, дотоодын хүнсний үйлдвэрлэл, хөгжлийн үйл явцыг виртуал системээр харах боломжтой юм.
Иймд Бүсчилсэн хөгжил хөдөлгөөн нь Монгол Улсын Ерөнхийлөгчийн санаачилсан “Хүнсний хувьсгал” хөдөлгөөнтэй нягт уялдан түүхий эд, бэлтгэн нийлүүлэлт, бараа бүтээгдэхүүн татан авалтын цэг, нэмүү өртгийн сүлжээ, кластер, тээвэр логистикийн нэгдсэн сүлжээг бий болгохоор төлөвлөж, цаашид хамтарч ажиллахаар санал солилцлоо.
