Монгол Улсын Ерөнхийлөгч У.Хүрэлсүхийн Бүгд Найрамдах Чех Улсад хийж буй төрийн айлчлалын хүрээнд “Баялаг бүтээгч-Бизнес аялал” зохион байгуулагдлаа.
Энэ удаа монголын бизнес эрхлэгчид Бүгд Найрамдах Чех Улсын хамгийн том шувууны мах, махан бүтээгдэхүүн үйлдвэрлэгч “Воднанске Курже” үйлдвэртэй танилцлаа. Тус бизнесийн бүрэлдэхүүнийг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ахалж ажиллав.
Зуун жилийн түүхтэй тус үйлдвэр нь тахиа, галууны махаар хагас болон бүрэн боловсруулсан 200 орчим нэр төрлийн бүтээгдэхүүн үйлдвэрлэдэг. Жилд 60 сая тахиа, дөрвөн сая галууны мах бэлтгэн дотоодын хэрэглээний 95 хувийг хангаж байна.
Тус үйлдвэр нь 2021 онд Бүрэн автомат технологийг нэвтрүүлсэн шинэ үйлдвэр ашиглалтад оруулж, үйлдвэрлэлээ өргөжүүлжээ. Нийт үйлдвэрлэлийнхээ 50 орчим хувийг европын орнуудад экспортлох бөгөөд 2024 онд 340 сая ам.долларын ашигтай ажилласан байна.
Үйлдвэрлэл хөгжсөн орноос суралцах, хамтын ажиллагаа эхлүүлэх “Баялаг бүтээгч-Бизнес аялал” Бүгд Найрамдах Чех Улсад амжилттай үргэлжилж байна.
