Ховд аймгийн төв буюу Жаргалант сумын хүн амын ундны усны чанар, аюулгүй байдалд хяналт шалгалт хийж байна.
Гуравдугаар сарын 22-нд болох “Мөнх цас мөсөн голоо хамгаалъя” уриалга бүхий дэлхийн усны өдрийг угтаж хүүхэд, өсвөр үе, залуусын дунд гар зургийн уралдаан, цахим сурталчилгааны уралдаан, спортын нөхөрсөг тэмцээн зэрэг олон талт үйл ажиллагааг байгаль орчны салбарынхан санаачлан зохион байгуулж байна.
Мөн ундны усны чанар, аюулгүй байдалд урьдчилан сэргийлэх хяналт шалгалт хийх тухай удирдамжийг үндэслэн Эрүүл мэндийн газар, Байгаль орчны газар, Жаргалант сумын ЗДТГ, Хар нуур-Ховд голын Сав газрын захиргаа, “Шим-Ус” ОНӨААТҮГ-ын мэргэжилтнүүд хамтран Жаргалант сумын гүн өрмийн худаг, цэвэр усны эх үүсвэр, дамжуулах станц гээд нийт 34 цэгээс дээж авчээ.
Улмаар дээжийг итгэмжлэгдсэн лабораторид хүргүүлэн шинжилгээ хийж, ундны усны чанар аюулгүй байдалд үнэлгээ дүгнэлт өгөхөөр ажиллаж байгаа тухай өнөөдөр Ховд аймгийн Байгаль орчны газраас мэдээллээ.
Цаашид мөн бусад сумын төвлөрсөн болон төвлөрсөн бус ус хангамжийн эх үүсвэрийн худаг, халдваргүйжүүлэх, дамжуулах станц, усан сан, түгээх байр, аж ахуйн нэгж, иргэний нийтэд түгээдэг хувийн худаг, усан сангуудад урьдчилан сэргийлэх хяналт шалгалт хийхээр төлөвлөжээ.
