Монгол Улсын Ерөнхийлөгчийн Тамгын газрын захирамжийн дагуу байгуулагдсан “Хүнсний хувьсгал”-ын дэргэдэх эрдэмтдийн зөвлөлийн VII хуралдаан боллоо. Хурлыг Ерөнхийлөгчийн Тамгын газрын Хүнсний, төсөл хөтөлбөрийн албаны дарга, Эрдэмтдийн зөвлөлийн орлогч дарга В.Мөнгөнсүх даргалж, цахимаар хуралдлаа.
Тус зөвлөл нь Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас баталсан 36-р тогтоол болон хэрэгжүүлэх арга хэмжээний төлөвлөгөөг шинжлэх ухаан, технологийг хөгжүүлэх бодлого, тэргүүлэх чиглэл, түүний үр дүнтэй нь уялдуулан хэрэгжүүлэхэд дэмжлэг үзүүлэх чиг үүрэгтэй юм.
Зөвлөлд Эрүүл мэндийн яам, Хүнс, хөдөө аж ахуй, хөнгөн үйлдвэрийн яам болон Лабораториудын эрдэмтдийг татан оролцуулж, эрдэмтдийн зөвлөлийн цар хүрээг тэлж, салбар дундын уялдааг хангах зорилгоор 28 эрдэмтэн судлаачидтай үйл ажиллагаагаа үргэлжлүүлэн явуулж байна.
Энэ удаагийн хуралдаанаар “Хүнсний хангамж, аюулгүй байдал” үндэсний хөдөлгөөний үр дүнг эрчимжүүлж, Бүсчилсэн хөгжилтэй уялдан хөдөө орон нутагт эрдэмтдийн зөвлөлийн салбар зөвлөлийг байгуулан хүнсний аюулгүй байдлыг хангахад эрдэмтэд, судлаачидтай хамтран ажиллах талаар хэлэлцэж санал солилцлоо.
Мөн Эрдэмтдийн зөвлөлийн 2025 оны үйл ажиллагааны төлөвлөгөөний төслийг танилцуулан, хэлэлцлээ.
Цаашид хөдөө орон нутгийн хүнс үйлдвэрлэлийн салбарт эрдэмтдийг татан оролцуулж, Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний үр дүнг эрчимжүүлэн ажиллах юм.
