Бүсүүдэд “Засгийн газар-Бүсийн зөвлөл”-ийн өргөтгөсөн хуралдаан зохион байгуулж, бүсийн хөгжлийг дэмжих төслүүдийг хэлэлцэн шийдвэрлэх, бэлтгэл ажлыг хангах ажлын хэсэг хуралдав.
Бүсийн зөвлөлийн өргөтгөсөн хуралдааныг Монгол Улсын Засгийн газрын 2025 оны 01 дүгээр сарын 14-ний өдрийн хуралдааны 3 дугаар тэмдэглэлээр бүсийн аймгуудын үсгийн дарааллаар жил бүр ээлжлэн зохион байгуулахаар шийдвэрлэсэн.
Уг чиглэлийн дагуу 2025 оны бүсийн зөвлөлийн өргөтгөсөн хуралдаан доор дурдсан байршилд зохион байгуулна.
- Баруун бүс – Баян-Өлгий аймагт;
- Хангайн бүс – Архангай аймагт;
- Хойд бүс – Булган аймагт;
- Төвийн бүс – Дархан-Уул аймагт;
- Зүүн бүс – Дорнод аймагт;
- Говийн бүс – Дорноговь аймагт.
Хуралдаанд бүсээс сонгогдсон Улсын Их Хурлын гишүүд, Засгийн газрын гишүүд, төрийн захиргааны байгууллага, бүсийн аймаг, сумдын удирдлага, хувийн хэвшил, олон улсын байгууллага, орон нутгийн төр захиргааны байгууллага, эрдэмтэн, судлаачид, иргэдийн төлөөлөл оролцох юм.
Иймд Бүсчилсэн хөгжил хөдөлгөөн нь Монгол Улсын Ерөнхийлөгчийн санаачилсан “Хүнсний хувьсгал” хөдөлгөөнтэй нягт уялдан түүхий эд, бэлтгэн нийлүүлэлт, бараа бүтээгдэхүүн татан авалтын цэг, нэмүү өртгийн сүлжээ, кластер, тээвэр логистикийн нэгдсэн сүлжээг бий болгохоор төлөвлөж, цаашид хамтарч ажиллана.
