Аймаг, орон нутагт “Хүнсний хувьсгал” үндэсний хөдөлгөөний дэргэдэх эрдэмтдийн зөвлөл болон мэргэжлийн холбооны салбар зөвлөл байгуулах тухай албан бичгийг Аймаг, Нийслэлийн засаг дарга нарт илгээж, хамтран ажиллахыг хүслээ.
Монгол Улсын Ерөнхийлөгчийн санаачилсан “Хүнсний хангамж, аюулгүй байдал” Үндэсний хөдөлгөөнийг 2022 онд УИХ-ын 36 дугаар тогтоолоор баталсан.
Уг тогтоолыг эрчимжүүлэх зорилго бүхий УИХ-ын түр хорооны 2023 оны 02 дугаар тогтоол, Засгийн газрын 2023 оны “Хүнсний хангамж, хөдөө аж ахуйн салбарын технологит ажлын талаар авах зарим арга хэмжээний тухай” 63 дугаар тогтоол тус тус батлагдсан.
Дээрх арга хэмжээнүүдийг төр, хувийн хэвшил, олон улсын байгууллага, мэргэжлийн холбоод, эрдэмтэн судлаачид зэрэг бусад талуудын хамтын оролцоотойгоор хэрэгжүүлж байна. Одоогийн байдлаар Ерөнхийлөгчийн Тамгын газрын даргын 2025 оны 29 дүгээр захирамжаар байгуулагдсан Эрдэмтдийн зөвлөл нь хүнсний хувьсгал мэргэжлийн холбоотой хамтран оролцож, “Хүнсний хангамж, аюулгүй байдал” үндэсний хөдөлгөөний үр дүнг эрчимжүүлэхэл шинжлэх ухааны үндэслэлтэй санал зөвлөмж өгөх, кластерийн бүтцээр ажиллах, хүнс, хөдөө аж ахуйн салбарын үйлдвэрлэгчдэд мэдээлэл хүргэх, зарим гол 19 нэрийн хүнсний бүтээгдэхүүний дотоодын хэрэгцээг хангахаас гадна экспортын бүтээгдэхүүний хэмжээг нэмэгдүүлэх зорилготой юм.
Цаашид аймаг, нийслэл, орон нутгийн түвшинд дээрх арга хэмжээний хэрэгжилтийг эрчимжүүлэхэд эрдэмтэн судлаачид, мэргэжлийн холбоодын оролцоог нэмэгдүүлж, үйл ажиллагааны цар хүрээг өргөжүүлэх шаардлага нэмэгдэж байна.
УИХ-ын 2022 оны 36 дугаар тогтоолын хэрэгжилтийн талаарх ээлжит 6 дахь удаагийн зөвлөлдөх нэгдсэн уулзалтыг улсын хэмжээнд бүх талуудыг оролцуулан 2025 оны 05 дугаар сарын 08-13-ны өдрүүдэд зохион байгуулахаар төлөвлөж байгаа юм.
