Өнөөдөр “Бодлогын уулзалт II” зохион байгуулж, Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөний талаар мэдээлэл сонсож, санал солилцлоо. Ерөнхийлөгчийн Тамгын газрын Хүнсний төсөл, хөтөлбөрийн албаны дарга В.Мөнгөнсүх “Хүнсний хувьсгал” үндэсний хөдөлгөөний үйл ажиллагааны тайланг танилцууллаа.
Чингэлтэй дүүргийн иргэдийн Төлөөлөгчдийн Хурлаас Монгол Улсын урт хугацааны хөгжлийн бодлого, тогтвортой хөгжлийн үзэл баримтлал, нийслэл, дүүргийн бодлого, зорилт түүний хэрэгжилтийн явц, үр дүнг дүүргийн Төлөөлөгч, удирдлагуудад таниулах бодлогын уулзалтыг тогтмол зохион байгуулахаар болсон юм.
Монгол Улсын Ерөнхийлөгч У.Хүрэлсүх хүнсний гол нэрийн 19 төрлийн бүтээгдэхүүнээр дотоодын хэрэгцээгээ бүрэн хангах зорилго тавьсан. “Хүнсний хангамж, аюулгүй байдал” үндэсний хөдөлгөөний хүрээнд төр, захиргааны 35 байгууллага хамтран ажиллаж, хууль, дүрэм, төсөв санхүү, хөнгөлөлттэй зээл, гааль, татварын хөнгөлөлт, чөлөөлөлт гээд 114 төрлийн арга хэмжээ авч байна.
Өнгөрсөн хоёр жилд арилжааны банкаар дамжуулан 5-6 хувийн хүүтэй, 3-5 жилийн хугацаатай, нийт 1.3 их наяд төгрөгийн зээлийг 3,100 орчим аж ахуйн нэгж, иргэнд олгосон.
Үүний дүнд хүнсний салбарт 24 үйлдвэр шинээр ашиглалтад орж, өнгөрсөн жил хүнсний ногооны хэрэгцээний 85 хувийг дотоодоос хангаж чадсан юм.
