Монгол Улсын Ерөнхийлөгчийн Тамгын газрын захирамжийн дагуу байгуулагдсан “Хүнсний хувьсгал”-ын дэргэдэх эрдэмтдийн зөвлөлийн VIII хуралдаан ХАБҮЛЛ-д боллоо. Тус хуралдааныг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр нээж үг хэллээ.
Тус зөвлөл нь Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд УИХ-аас баталсан 36-р тогтоол болон хэрэгжүүлэх арга хэмжээний төлөвлөгөөг шинжлэх ухаан, технологийг хөгжүүлэх бодлого, тэргүүлэх чиглэл, түүний үр дүнтэй нь уялдуулан хэрэгжүүлэхэд дэмжлэг үзүүлэх чиг үүрэгтэй юм.
Хуралдаанаар Эрдэмтдийн зөвлөлийн гишүүн, ХААИС-ийн захирал Б.Баасансүх 2025 оны үйл ажиллагааны төлөвлөгөө боловсруулах ажлын хэсгийн дүгнэлт, шийдвэрийг танилцууллаа. Мөн “Хүнсний хангамж, аюулгүй байдал” үндэсний хөдөлгөөний үр дүнг эрчимжүүлж, Бүсчилсэн хөгжилтэй уялдан хөдөө орон нутагт эрдэмтдийн салбар зөвлөл байгуулж хамтран ажиллах талаар хэлэлцлээ.
Эрдэмтдийн зөвлөлийн 2025 оны үйл ажиллагааны төлөвлөгөөнд:
- Хүнс, Хөдөө аж ахуйн салбарын мэргэжилтний эрэлт хэрэгцээ, хангамжийн өнөөгийн байдалд судалгаа хийх
- Их дээд сургууль, техникийн болон мэргэжлийн сургуулиудад боловсрол олгож буй мэргэжлийн хөтөлбөрт дүн шинжилгээ хийх
- Хүнс, Хөдөө аж ахуйн салбарт шинээр бэлтгэх мэргэжлийн хөтөлбөрүүд, хөгжлийн чиг хандлага
- Монгол Улсын Хүнсний аюулгүй байдлын гүйцэтгэлийн аудитын үнэлгээтэй танилцах
- Гүйцэтгэлийн аудитын үнэлгээний үр дүнд тулгуурлан төлөвлөгөө боловсруулах
- Зөвлөмж, шийдвэрийн хэрэгжилтийн үр дүнг дүгнэх
- Ажлын үр дүнг Хүнс, хөдөө аж ахуйн салбарын эрдэмтдийн зөвлөлд танилцуулах зэрэг ажлуудыг төлөвлөжээ.
Дээрх ажлуудаас Хүнс, Хөдөө аж ахуйн салбарын мэргэжилтний эрэлт хэрэгцээ, хангамжийн өнөөгийн байдалд судалгаа хийж, хүний нөөцийн асуудалд төвлөрч ажиллах саналыг зөвлөлийн гишүүдийн 100 хувийн саналаар баталлаа. Мөн эрдэмтэд Монгол хүн эрүүл аюулгүй хүнс хүртэж, хүртээж чадаж байгаа эсэх асуудалд анхаарч, цаашид “Хүнсний хангамж, аюулгүй байдал” хөдөлгөөнийг эрчимжүүлэн ажиллах шаардлагатайг онцоллоо.
