Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, ЕТГ-ын Хүнсний төсөл, хөтөлбөрийн албаны дарга В.Мөнгөнсүх болон холбогдох албаныхан Хүнсний Аюулгүй Байдлын Үндэсний Лавлагаа Лабораторид ажиллалаа. ХАБҮЛЛ-ын Ерөнхий захирал О.Нандин-Эрдэнэ лабораторийн үйл ажиллагааг танилцууллаа.
ХАБҮЛЛ нь хүнсний лабораторийн шинжилгээний мэдээллийн нэгдсэн санг бүрдүүлэх, хүнсний аюулгүй байдлын сорилт шинжилгээ, тандалт судалгаа, эрсдлийн үнэлгээ хийх, шинжилгээний ур чадварыг үнэлэх сорилтыг зохион байгуулж, тандалт судалгааг лабораторийн шинжилгээний үр дүнд тулгуурлан гүйцэтгэж байгаа юм.
Үйл ажиллагааны чиглэл:
- Хүнсний аюулгүйн үзүүлэлт буюу хүнсэн дэх нян, мөөгөнцөр, тэдгээрийн хор, физик, химийн бохирдлыг эрүүл ахуйн зөвшөөрөгдөх хэмжээнд байгаа эсэхийг шинжлэх болон паразит илрүүлэн тодорхойлох;
- Орчны аюулгүйн үзүүлэлт буюу хөрс, ус, агаарын хими, биологийн бохирдлыг эрүүл ахуйн зөвшөөрөгдөх хэмжээнд байгаа эсэхийг шинжлэн тодорхойлох;
- Ахуйн хими, гоо сайхан, ариун цэврийн бүтээгдэхүүний аюулгүйн анхан шатны болон амьтан дээр биотуршилтын шинжилгээ хийж, эрүүл ахуйн зөвшөөрөгдөх хэмжээнд байгаа эсэхийг тодорхойлох;
- Ургамал, ургамлын гаралтай түүхий эд, хүнсний бүтээгдэхүүн, сав баглаа боодол зэрэгт гадаад болон дотоод хорио цээртэй хортон шавьж, хачиг, хог ургамал, ургамлын өвчин илрүүлэн тодорхойлох;
- Бүх төрлийн таримал ургамлын үр, үр тарианд тариалалтын болон технологийн чанарын шинжилгээ хийх;
- Гадаад орчин (агаар, хөрс, ус), барилгын материал, хүнсний түүхий эд, бүтээгдэхүүнд цацраг идэвхт бохирдлын хэмжээ, мэргэжлийн шарлагын хувийн тунгийн хэмжээг тодорхойлох, ионжуулагч цацраг үүсгэгч багаж, тоног төхөөрөмжийн чанарын баталгаажилтын хэмжилт шинжилгээ, хүний эрүүл мэнд, байгаль орчинд сөргөөр нөлөөлөх ионжуулагч цацрагийн урьдчилан сэргийлэх хэмжилт шинжилгээ хийх;
- Өргөх механизмын техникийн хяналт, магадлан шинжилгээг тус тус гүйцэтгэж байна.
Уулзалтаар хүнсний аюулгүй байдалд хяналт, шинжилгээ судалгааны тогтолцоог сайжруулах, салбарын хүний нөөц, тоног төхөөрөмжийн шинэчлэлт хүртээмжийг нэмэгдүүлэх тал дээр анхаарах шаардлагатай талаар хэлэлцэж, санал солилцлоо.
