Хөвсгөл аймагт хүүхэд, өсвөр үеийнхний дуу хоолой, санал бодлыг сонсож, тулгамдсан асуудлуудыг тодорхойлон шийдвэр гаргах түвшинд хүргэх зорилготой “Нэг зорилго нэг ирээдүй” аймгийн хүүхдийн 12-р чуулган боллоо.
Чуулганы нээлтэд Хөвсгөл аймгийн Засаг дарга Л.Төмөрбаатар оролцож мэндчилгээ дэвшүүллээ.
Тэрбээр “Орон нутагт гэр бүлийн хөгжлийн цогц төвийг төр, хувийн хэвшлийн түншлэлээр ажиллуулж, нийгмийн болон хөгжлийн үйлчилгээг үзүүлнэ.
Хүүхэд бүрийн ялгаатай хэрэгцээнд үндэслэн хөгжил төлөвшлийг дэмжиж, боловсролын үйлчилгээний хамрагдалтыг 99 хувьд хүргэнэ. “Өдөр бүр сүү” хөтөлбөрийг хэрэгжүүлж, хүүхдийн эрүүл мэндийг дэмжинэ.
Эрсдэлт нөхцөлд байгаа, хараа хяналтгүй хүүхдийг илрүүлэх арга хэмжээ авч, хариу үйлчилгээ болон хяналтыг сайжруулж, хүүхэд өсвөр үеийн бодит оролцоо, хэрэгцээ сонирхлыг дэмжиж, хөгжлийн үйлчилгээнд хамрагдалтыг нэмэгдүүлнэ” гэдгийг хэллээ.
Хөвсгөл аймаг 18 хүртэлх насны 49831 хүүхэдтэй. Тус чуулганаар Хөвсгөл аймгийн хүүхдийн өнөөгийн нөхцөл байдал, цаашид анхаарах асуудал бодлого төлөвлөлтийн талаар ярилцаж аймаг, сумын Хүүхдийн зөвлөлийн үйл ажиллагаа, сайн туршлага, анхаарах асуудал зэргийг хэлэлцлээ.
Мөн тулгамдаж буй асуудлуудын талаар “Надад хэлэх үг байна” сэдвийн дор санал, асуулт явуулж аймаг орон нутгийн удирдлагуудаас хариулт авсан юм.
Чуулганд Хөвсгөл аймгийн 50 мянган хүүхдийн төлөөлөл болж 23 сум 1 тосгоны 34 сургуулиас 112 хүүхэд, аймаг, сумын удирдлагууд, холбогдох байгууллагуудын төлөөлөл бүхий 250 гаруй хүн оролцлоо.
Эх сурвалж: Монцамэ агентлаг
