Аймаг, орон нутагт “Хүнсний хувьсгал” үндэсний хөдөлгөөний дэргэдэх эрдэмтдийн зөвлөл болон мэргэжлийн холбооны салбар зөвлөл байгуулах тухай 2 дугаар хуралдааныг Аймаг, Нийслэлийн засаг дарга нар болон холбогдох албаныхантай цахимаар зохион байгууллаа.
Хурлаар Ерөнхийлөгчийн Тамгын газар, “Хүнсний хувьсгал” мэргэжлийн холбооны Гүйцэтгэх захирал Б.Баярцэцэг болон Эрдэмтдийн зөвлөлийн төлөөлөл оролцож 21 аймгийн засаг дарга нарт мэдээлэл хүргэж, санал солилцлоо.
Монгол Улсын Ерөнхийлөгчийн санаачилсан “Хүнсний хангамж, аюулгүй байдал” Үндэсний хөдөлгөөнийг 2022 онд УИХ-ын 36 дугаар тогтоолоор баталсан.
Дээрх арга хэмжээг төр, хувийн хэвшил, олон улсын байгууллага, мэргэжлийн холбоод, эрдэмтэн судлаачид зэрэг бусад талуудын хамтын оролцоотойгоор хэрэгжүүлж байна. Одоогийн байдлаар Ерөнхийлөгчийн Тамгын газрын даргын 2025 оны 29 дүгээр захирамжаар байгуулагдсан Эрдэмтдийн зөвлөл нь хүнсний хувьсгал мэргэжлийн холбоотой хамтран оролцож, “Хүнсний хангамж, аюулгүй байдал” үндэсний хөдөлгөөний үр дүнг эрчимжүүлэхэл шинжлэх ухааны үндэслэлтэй санал зөвлөмж өгөх, кластерийн бүтцээр ажиллах, хүнс, хөдөө аж ахуйн салбарын үйлдвэрлэгчдэд мэдээлэл хүргэх, зарим гол 19 нэрийн хүнсний бүтээгдэхүүний дотоодын хэрэгцээг хангахаас гадна экспортын бүтээгдэхүүний хэмжээг нэмэгдүүлэх зорилготой юм.
Цаашид аймаг, нийслэл, орон нутгийн түвшинд дээрх арга хэмжээний хэрэгжилтийг эрчимжүүлэхэд эрдэмтэн судлаачид, мэргэжлийн холбоодын оролцоог нэмэгдүүлж, Бүсчилсэн хөгжилтэй уялдан үйл ажиллагааны цар хүрээг өргөжүүлэх шаардлага нэмэгдэж байна.
Хурлаар 21 аймаг дахь эрдэмтэн судлаачдыг томилон, цаашид ажиллах чиг үүргийг өгөх тухай санал солилцож, дараагийн хурлаар үйл ажиллагааны төлөвлөгөөг хэлэлцэхээр боллоо.
