Монгол Улсын бүсчилсэн хөгжлийн үзэл баримтлалд “Орон нутагт ажиллаж, амьдрах, бизнес эрхлэх таатай нөхцөлийг бүрдүүлсэн өрсөлдөх чадвартай бүсүүдийг хөгжүүлэх; Бүс нутгийн хөдөлмөр эрхлэлтийг дэмжиж, ажилгүйдэл, ядуурлыг бууруулах;” зорилтууд тусгагдсан. 

Бүсчилсэн хөгжлийн бодлогын хүрээнд орон нутгийн бизнес эрхлэгчдийн хамтын ажиллагааг эрчимжүүлж, ажлын байрыг бий болгох цаашлаад бүс нутгийн эдийн засгийн өрсөлдөх чадварыг нэмэгдүүлэхэд төр, хувийн хэвшлийн оролцоо, хамтын ажиллагааг дэмжих зорилгоор бүсийн брэнд бүтээгдэхүүн шалгаруулах арга хэмжээг зохион байгуулахаар төлөвлөөд буй юм.

Ингэхдээ орон нутгийн түүхий эдийн нөөц, боломж, онцлог давуу тал дээр тулгуурлан, өвөрмөц орц найрлага, хийц загвар бүхий орон нутгийн онцлогтой, газар зүйн заалттай брэнд бүтээгдэхүүнийг нээн илрүүлэх, олон улсад өрсөлдөх чадвартай, чанар стандарт хангасан бүтээгдэхүүний судалгаа, хөгжүүлэлтийг хийх, олон нийтэд сурталчлан таниулахад чиглэнэ.

Энэ хүрээнд Бүсчилсэн хөгжлийн үндэсний хүрээлэн, Хүнс, хөдөө аж ахуй, хөнгөн үйлдвэрийн яам, Хүнсний хангамж, аюулгүй байдал үндэсний хөдөлгөөн, Оюуны өмчийн газар, Стандарт, хэмжил зүйн газрын хамтарсан уулзалт хийлээ.