Ховд аймагт байгаль орчныг хамгаалах, хууль бус агнуурыг таслан зогсоох, урьдчилан сэргийлэх чиглэлээр хяналт шалгалт хийж байна.

Аймгийн Байгаль орчны газар, Хар Ус нуур орчмын улсын тусгай хамгаалалтын захиргаа, Цагдаагийн газрын төлөөллүүд энэ сарын 4-ний өдрөөс эхлэн Хар Ус нуурын тусгай хамгаалалттай газар нутагт хяналт шалгалт хийж буй.

Мэргэжилтнүүд байгаль орчны эсрэг гэмт хэрэг, зөрчлийг илрүүлэх, хууль бусаар байгалийн нөөц баялгийг ашиглах, бэлтгэх, амьтан агнах, барих, тэдгээрийн гаралтай түүхий эдийг худалдах, худалдан авах, хадгалах, тээвэрлэх үйл ажиллагаанд хяналт тавьж, холбогдох хууль тогтоомжийг иргэдэд сурталчлахын зэрэгцээ илэрсэн зөрчлийг шийдвэрлэх юм.

Амьтны тухай хуульд заасны дагуу жил бүрийн дөрөвдүгээр сарын 1-ний өдрөөс зургаадугаар сарын 15-ны өдөр хүртэл загас агнах, барихыг хориглодог. Учир нь энэ хугацаа бол загасны үржлийн оргил үе юм.

Загасны үржлийн үед агнахад тухайн төрөл зүйл устах аюултай.

Иймд иргэдийг зөвшөөрөлгүй загас агнах, барих, худалдах, худалдан авах зэрэг хууль бус үйл ажиллагаа явуулж хэрэг, зөрчилд холбогдохгүй байхыг анхаарууллаа.

Зөвшөөрөлгүй амьтан агнавал нөхөн төлбөр буюу торгууль төлнө. Эрүүгийн хууль болон Зөрчлийн тухай хуульд зааснаар хариуцлага хүлээлгэх юм. Иймээс иргэдийг хууль бус үйл ажиллагаанд оролцохгүй байхыг мэргэжилтнүүд уриалав.

Эх сурвалж: Монцамэ агентлаг