Монгол Улсын Засгийн газар “Хүн амын өсөн нэмэгдэж байгаа хүнсний хэрэгцээг хангах зорилгоор “Атрын IV Тариалангийн тогтвортой хөгжлийн аян”-ыг хэрэгжүүлж, газар тариалангийн нийт эргэлтийн талбайг 200 мянган га-аар нэмэгдүүлэхээр тусгасан. Засгийн газрын /2025.04.09/ хуралдаанаар “Атар газрыг тариалангийн газарт шилжүүлэх тухай” асуудлыг хэлэлцэн баталлаа.
Хуралдаанаар Дархан-Уул, Дорнод, Дундговь, Төв, Хэнтий, Говьсүмбэр зэрэг аймгуудын нутаг дэвсгэр дэх нийт 71 235 га атар газрыг тариалангийн газрын ангилалд шилжүүлэхээр шийдвэрлэлээ.
Ийнхүү атар газрыг тариаланд шилжүүлснээр газрын нэгдмэл сангийн бүртгэлтэй 1.2 сая га тариалангийн талбайн хэмжээг 1.27 сая га-д хүргэж, “Хүнсний хувьсгал”, “Атрын IV аян”, “Шинэ хоршоо” хөдөлгөөн зэрэг төрөөс хэрэгжүүлж буй томоохон бодлогын хэрэгжилтийг эрчимжүүлэх, хүн амын хүнсний хангамжийг нэмэгдүүлэх, хөдөө аж ахуйг дэмжих, орон нутагт шинээр ажлын байр бий болгох зэрэг ач холбогдолтой юм.
