Монгол Улсын Шадар сайдын тушаалаар байгуулагдсан хамтарсан хяналт, шалгалтын ажлын хэсэг Дархан-Уул аймагт ажиллажээ. Хамтарсан ажлын хэсэг Дархан-Уул аймгийн зах худалдааны төвүүдэд ажиллаж, иргэдийн хүнсний хэрэгцээнд нийлүүлэгдэж буй мах, махан бүтээгдэхүүний чанар, аюулгүй байдал дотоодын болон импортын жимс, хүнсний ногоонд пестицидийн үлдэгдэл байгаа эсэхэд лабораторийн шинжилгээ хийсэн байна. Хүнсний аюулгүй байдлын үндэсний лавлагаа, лабораторийн мэргэжилтнүүд “Дархан” захын хүнсний лангуу дээр худалдаалагдаж буй төмс, манжин, ногоон чинжүү зэрэг 10 төрлийн жимс, хүнсний ногооноос дээж авч импортын хоёр, дотоодын хоёр хүнсний ногоонд хурдавчилсан шинжилгээ хийхэд импортын ногоон чинжүүнээс пестицидийн үлдэгдэл илэрчээ. Пестицидийн илэрцтэй гарсан дээрх хүнсний ногоон дээр лабораторийн нарийвчилсан шинжилгээ хийж баталгаажуулна гэж ХАБҮҮЛ-ийн хими, хор судлалын лабораторийн эрхлэгч Л.Уранчимэг мэдэгдлээ.
Пестицидийн үлдэгдэл зохистой хэмжээнээс хэтэрсэн тохиолдолд хүний эрүүл мэндэд сөргөөр нөлөөлж, олон өвчний эх үүсвэр болох эрсдэлтэй юм.
