Ховд аймагт 3200 гаруй газар тариалан эрхлэгч бий. Тус аймгийн газар тариалан эрхлэгчдийн зөвлөгөөн энэ сарын 8-нд болж, 17 сумаас 250 орчим хүн оролцлоо. Тэд “Атар-4” тариалангийн тогтвортой хөгжлийн аян сэдвийн хүрээнд зөвлөлдөж, орон нутгийнхаа газар тариалангийн салбарыг өргөжүүлэх талаар санал солилцов. 

Өнгөрсөн онд Ховд аймгийн тариаланчид 2900 орчим га талбайд тариалалт хийж, 29 мянган тонн ургац хураан авсан.  Тэгвэл энэ жил тариалалтын талбайн хэмжээг нэмэгдүүлж, 3500 га болгохоор урьдчилсан байдлаар төлөвлөж байна.  Орон нутагт жил бүр тариаланчдын тоо, ургацын хэмжээ нэмэгдэж байгаа. 

Цаашид зарим нэр төрлийн хүнсний ногоо, бүтээгдэхүүний чанарт анхаарч, үр сортыг шинэчлэх, тэжээлийн ургамлын тариалалтыг нэмэгдүүлэх, услалтын симтемийг өргөжүүлэх, тариалангийн ажилд орчин үеийн дэвшилтэт технологи нэвтрүүлж хөрс, уур амьсгалын онцлогт тохирсон шинэ болон ашигт таримлыг нутагшуулах, тариалалтын талбайн хэмжээг ойрын жилүүдэд 10 мянган га-д хүргэх гэх мэт зорилт дэвшүүлж, олон ажил хэрэгжүүлэхээр төлөвлөсөн гэдгийг орон нутгийн удирдлагууд танилцууллаа.

Монгол Улсын Засгийн газрын 47 дугаар тогтоолоор “Атар 4″ тариалангийн тогтвортой хөгжлийн аяныг улсын хэмжээнд дөрвөн жилийн хугацаанд эрчимтэй хэрэгжүүлэхээр шийдвэрлэсэн. Энэ удаагийн зөвлөгөөнөөр Ерөнхийлөгчийн санаачилсан “Тэрбум мод”, “Хүнсний хувьсгал” үндэсний хөдөлгөөн, Ерөнхий сайдын санаачилсан “Шинэ сэргэлтийн бодлого”, Засгийн газрын “Атрын 4″ тариалангийн тогтвортой хөгжлийн аяныг хэрэгжүүлэх цаашдын бодлого, зорилтоо тодорхойлсон юм.