Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Өвөрхангай аймгийн Арвайхээр суманд “Хүнсний хангамж, аюулгүй байдал” үндэсний хөдөлгөөний хүрээнд аймагтаа талх, нарийн боов үйлдвэрлэдэг “Хөндийн хөх чоно” ХХК-ний “Орда” үйлдвэрийн үйл ажиллагаатай танилцлаа.
Тус үйлдвэр нь “Хүнсний хувьсгал” үндэсний хөдөлгөөний хүрээнд олгодог бага хүүтэй, урт хугацаатай хөнгөлөлттэй зээлд хамрагдан үйлдвэрийн тоног төхөөрөмжийг шинэчилж, 11 хүнийг ажлын байраар хангажээ. Мөн сав, баглаа боодлыг орчин үеийн стандартад нийцүүлэн, эрүүл ахуйн шаардлага хангасан нутгийн брэнд бүтээгдэхүүн үйлдвэрлэж байна.
“Орда” хүнсний үйлдвэрийн захирал Ч.Гантулга
“Манай үйлдвэр 2018 оноос эхлэн үйл ажиллагаа явуулж байна. Энэ хугацаанд 11 төрлийн бүтээгдэхүүн үйлдвэрлэж Өвөрхангай аймгийн бүх сумдад бүтээгдэхүүнээ борлуулахаас гадна Баянхонгор аймгийн зарим сумдын иргэдэд шинэ, стандартын шаардлага хангасан талх, нарийн боов түгээдэг юм. “Хүнсний хувьсгал” хөдөлгөөний хүрээнд авсан хөнгөлөлттэй зээл үйлдвэрийн хүчин чадлыг нэмэгдүүлж, зах зээлд өрсөлдөх том боломж олгож байна” гэв.
Мөн орон нутгийн хүнсний салбарын баялаг бүтээгчид Бүсчилсэн хөгжлийн бодлогын хүрээнд “Хүнсний хувьсгал” үндэсний хөдөлгөөний 2 дугаар шатыг эхлүүлэн эрчимжүүлж, жижиг дунд үйлдвэрлэлийг дэмжих хэрэгтэйг хэлж байлаа.
