Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Архангай аймгийн Цэнхэр суманд “Хүнсний хангамж, аюулгүй байдал” үндэсний хөдөлгөөний хүрээнд аймагтаа эрчимжсэн мал, аж ахуй эрхэлж буй “Мөнхтамир ти би эй эйф” ХХК-ийн үйл ажиллагаатай танилцлаа.

“Мөнхтамир ти би эй эйф” ХХК нь гурван жилийн өмнөөс үйл ажиллагаа явуулж эхэлсэн бөгөөд сүүний болон махны чиглэлийн монбиллиард, герефорд үүлдрийн 400 гаруй үхэртэй. Ингэхдээ нутгийн таван өрх хоршоо болон нэгдэж, уламжлалт мал аж ахуйг эрчимжсэн мал аж ахуйтай хослуулж байна.

Монбиллиард нь Монголын эрс тэс уур амьсгалд дасан зохицох чадвартай, Францын Монтблан уулын бүсэд нутагшсан, шилмэл үүлдрийн үхэр аж. Францын сүүний чиглэлийн үүлдрийн үхрээс өөх тос, уургийн хамгийн сайн харьцааг илэрхийлдэг бөгөөд 3.2-3.8 хувийн тослогтой сүүтэй.

Тус аж ахуй нь Архангай аймагтаа жишиг фермерийг хөгжүүлж, малчин өрхүүдийн амьдралын нөхцөл боломжийг сайжруулан, ажлын байраар хангаж байгаа юм.

Цаашид “Хүнсний хангамж, аюулгүй байдал” үндэсний хөдөлгөөний хүрээнд олгогддог хөнгөлөлттэй зээлд хамрагдан сүргийн тоог ихэсгэж, аймгийн хэмжээнд сүү цагаан идээ болон өндөр зэрэглэлийн стэйкний махыг борлуулахаар зорьж байна.