Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон Ерөнхийлөгчийн тамгын газрын холбогдох хүмүүс Архангай аймагт ажиллаж байна. Энэ хүрээнд “Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах зөвлөлдөх уулзалтыг аймгийн удирдлагууд, газар тариалан, хүнсний үйлдвэрлэл эрхлэгчдыг хамруулан зохион байгуулав.

Зөвлөлдөх уулзалтад 70-аад аж ахуйн нэгж оролцон, Монгол Улсын Ерөнхийлөгчийн санаачилсан үндэсний хэмжээний хөдөлгөөн болох “Хүнсний хувьсгал”-ын талаар, үүний хүрээнд олгож буй зээлийн тухай дэлгэрэнгүй мэдээлэл авч, өөрсдөд тулгамддаг асуудлуудаа ярилцан, харилцан санал солилцсон юм.

Уулзалтын үеэр газар тариалан эрхлэгчид үндэсний хэмжээнд хэрэгжиж байгаа хөдөлгөөнүүдийг дэмжиж буйгаа нэн түрүүнд илэрхийлээд, өөрсдийн асуудлаа түлхүү хэлж байлаа. Тухайлбал, тариаланч, малчин хоёрын маргааныг шийдвэрлэх нарийн зохицуулалттай болох, тариалангийн газар нэмж олгох зохицуулалтыг шийдэх, импортын гурил, будааны хөнгөлөлтийг эргэж харах, газар тариалангийн техник, тоног төхөөрөмжийг нийлүүлдэг компанийг сонголттой, чанартай техник оруулж ирэхэд нь нөлөөлөх, техникийн гаалийн татварт уян хатан хандах, ахмад тариаланчдыг бодлогоор дэмжих, зээлийн шалгууруудыг багасгаж, хүүг бууруулан, хугацаа уртасгах боломжийг эрэлхийлж, шийдэж өгөх, зээлийн нэг хувийн шимтгэлийг болиулах зэрэг санал хүсэлтийг тавилаа.

Нөгөө талаас малчдын бэлтгэсэн ноос, ноолуурыг үндэсний үйлдвэрлэлийн компаниуд үнэ унагахгүй, зах зээлийн үнээр авдаг болохыг хэлж, дэмжиж өгөх, цаашлаад үнэ тогтворгүй, зэх зээлийн үнээс бага үнээр авсан тохиололд хариуцлага тооцдог механизмтай болох, мал, мах бэлтгэлийн системийг эргэж сэргээн, махны ноогдол ашгийг тогтоон, олгодог болох, малын ангилалт, эрүүл мэндийн асуудлыг ч хөндөн тавьж байв.

Эдгээр санал хүсэлтийг аймгийн ХХААГ-т нэгтгэн авч, Ерөнхийлөгчийн тамгын газарт албан тоотоор уламжилахаар боллоо.  

Архангай аймагт 47 хүнсний үйлдвэр, аж ахуйн нэгж “Хүнсний хувьсгал”-ын хүрээнд олгосон хөнгөлөлттэй зээлд хамрагдаж, мах, сүү сүүн бүтээгдэхүүн зэргийг дотоодоосоо 100 хувь хангахын зэрэгцээ аймгийн ДНБ-ий хэмжээг 2.6 хувиар өсгөсөн байна.