Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Булган аймагт баригдах “Үйлдвэр технологийн парк”-ийн зураг, төсөлтэй танилцлаа.

Бүсчилсэн хөгжлийн бодлогын хүрээнд Булган аймагт хөдөө аж ахуйн салбарыг хөгжүүлэх Үйлдвэр технологийн паркийг байгуулах бөгөөд эрүүл ахуйн шаардлага хангасан мах, сүү сүүн бүтээгдэхүүнээр Хойд бүсийн иргэдийг хангахын зэрэгцээ түүний дагалдах баялаг арьс шир боловсруулах ноос угаах зэрэг үйлдвэрүүдийг барихаар төлөвлөөд буй.

Тус Үйлдвэр технологийн паркийг “Монгол улсын Засгийн газрын 2024-2028 оны үйл ажиллагааны хөтөлбөр”-ийн “Хүнсний хангамж, аюулгүй байдал” үндэсний хөдөлгөөний хүрээнд гол нэр төрлийн хүнсний бүтээгдэхүүний хэрэгцээг дотооддоо бүрэн хангаж, экспортод гаргах чиглэлийн дагуу байгуулах юм.

“Үйлдвэр технологийн парк” байгуулах нийт төсөвт өртөг 30.16 тэрбум төгрөг байх юм.

Үүнд:

• “Сум дундын мах нядлах, мах ангилан боловсруулах цогцолбор үйлдвэр”- 7.16 тэрбум төгрөг
• “Арьс шир боловсруулах, ноос угаах үйлдвэр”- 15 тэрбум төгрөг
• Шилэн хүлэмж- 3 тэрбум

Аж үйлдвэрийн салбарт хамаарах хүнд үйлдвэрийг үйлдвэрлэл, технологийн парк хэлбэрээр байгуулж, хөгжүүлснээр уул уурхайн гаралтай үйлдвэрлэлээс мэдлэг, нэмүү өртөг шингэсэн бүтээлч үйлдвэрлэлийн бүтцэд аажмаар шилжиж, экспортын чиг баримжаатай, импортыг орлох бүтээгдэхүүний тоо хэмжээ, нэр төрлийг нэмэгдүүлж, уул уурхайн хэт хамаарлыг багасгах, боловсруулах үйлдвэрийн дотоодын нийт бүтээгдэхүүнд эзлэх хувь хэмжээ, эдийн засгийн үр өгөөж, татварын орлого, бааз суурийг нэмэгдүүлэх, орон нутагт ажлын байрыг олноор нэмэгдүүлж хот суурин газрыг чиглэсэн хүн амын хэт төвлөрлийг сааруулах зэрэг эдийн засаг, нийгмийн олон чухал ач холбогдолтой.

Нийт 90 га талбайд хэрэгжих энэ төслийн эхний үе шатанд 642 мкв газрыг “Бизнес инкубатор төв” барихаар төлөвлөж, газрыг эзэмшүүлэн зураг төсвийг 2023 онд хийлгэж магадлалаар баталгаажуулжээ.

Цаашид салбарын хэмжээнд шаардлагатай хөрөнгө оруулалт:

• Жижиг дунд үйлдвэрийг дэмжих бизнес инкубатор зөвлөх үйлчилгээ нэн шаардлагатай байгаа тул “Бизнес хөгжлийн төв” байгуулж, бичил, жижиг, дунд үйлдвэрлэл үйлчилгээ эрхлэгчдийг чадавхжуулах
• Жижиг, дунд үйлдвэрлэл үйлчилгээ эрхлэгчдэд техник, тоног төхөөрөмжийн дэмжлэг үзүүлэх
• Жижиг, дунд үйлдвэрийг дэмжих сангийн хөрөнгийн эх үүсвэрийг 5 тэрбум төгрөгт хүргэх
• “Булган үйлдвэр технологийн парк”-ийн ТЭЗҮ-ийг шинэчлэн, төлөвлөлтийн дагуу үргэлжлүүлэх